Ангела Меркель Германия канцлери лавозимида бўлганида Россиянинг Украинага бостириб киришига имкон берадиган бир қатор қарорлар қабул қилди. Бу ҳақда Бундестагдаги мудофаа масалалари бўйича қўмита раҳбари Мари-Агнес Штрак-Зиммерманн RTL ва н-тв телеканалларига берган интервьюсида маълум қилди.
Зиммерманнинг сўзларига кўра, Германиянинг Украинага НАТОга аъзо бўлиши учун йўл очишдан бош тортгани бу борадаги биринчи хато ҳисобланади. 2008 йилда НАТОнинг кўплаб давлатлари Украинанинг алянсга муддатидан олдин қабул қилиниши тарафдори бўлгани, бироқ Германия ва Франция Россиянинг позицияси туфайли ўшанда қарши чиққани таъкидланади.
“Бу ўша пайтда французлар ва Ангела Меркелнинг катта хатоси бўлган”, — деди немис депутати.
Шунингдек, у Германия энди Ангела Меркель ҳукмронлигининг бутун даврини ва “айниқса, нотўғри ҳисоб-китобларга тўла сўнгги бир неча йил тарихини” қайта кўриб чиқишга мажбур бўлишини қўшимча қилди.
“Замин” янгиликларини “Telegram”да кузатиб боринг
