Женевада Украинадаги ҳуқуқбузарликларни текшириш бўйича мустақил халқаро комиссия ҳисоботи тақдим этилди. Унда РФ Қуролли кучлари ва Украина Қуролли кучлари томонидан даъво қилинган ҳарбий жиноятларга оид далиллар мавжуд.
Украинага бостириб киришдан кейин Россия қуролли кучлари бу давлатда кўплаб ҳарбий жиноятлар содир этди, дея маълум қилди 16 март, пайшанба куни Женевада Украинадаги ҳуқуқбузарликларни текшириш бўйича мустақил халқаро комиссия раиси Эрик Мёсе.
У Россия армияси аъзолари, шу жумладан қўмондонлар томонидан содир этилган жиноятларнинг ўзига хос турлари кўрсатилган ҳисоботни тақдим этди. Бу жиноятлар сирасига тинч аҳолига ва Украинанинг энергетика инфратузилмасига ҳужумлар, қасддан қотиллик, ноқонуний қамоққа олиш, қийноқлар, зўрлаш ва бошқа турдаги жинсий жиноятлар, шунингдек, болаларни Россияга депортация қилиш ва ноқонуний олиб кетиш киради.
Комиссияга кўра, Россия Қуролли кучларининг Украина энергетика инфратузилмасига 10 октябрда бошланган ҳужумлари инсониятга қарши жиноятлар сифатида квалификация қилиниши мумкин. Инфратузилма объектларининг вайрон бўлиши бутун минтақалар ва миллионлаб одамлар вақти-вақти билан электр ва иссиқликсиз қолишига олиб келди, деди Мёсе.
Россия армияси аҳоли пунктларига портловчи қуроллар билан ҳужум қилди ва бунда «тинч аҳолининг зарари ва азоб-уқубатларини инобатга олмади», дейилади хабарда. «Портловчи қурол» атамаси артиллерия снарядлари ёки ракеталар каби ўқ-дориларни ўз ичига олади.
Комиссия Украинада содир этилган барча қонунбузарликлар ва жиноятларни тергов қилишни давом эттиришни ва айбдорларни жавобгарликка тортишни тавсия қилди. Ҳарбий жиноятчилар рўйхати БМТ Инсон ҳуқуқлари бўйича Олий комиссарига топширилади, дея маълум қилди Эрик Мёсе.
БМТ терговчилари Украина уруш жиноятларини ҳам ҳужжатлаштирган. Хусусан, ҳисоботда россиялик ҳарбий асирларни қийноққа солиш ва қатл этиш бўйича иккита ҳолат қайд этилган.
2022 йил март ойида БМТ Инсон ҳуқуқлари кенгаши томонидан Украинадаги ҳуқуқбузарликлар бўйича мустақил халқаро тергов комиссияси тузилган. Ўшандан бери у Украинанинг 56 жойида, жумладан Бучада ишлаган ҳамда 348 эркак ва 247 аёл билан суҳбатлашган.
“Замин” янгиликларини “Telegram”да кузатиб боринг
