АҚШнинг собиқ президенти Доналд Трамп қамоққа олиниши мумкинлиги ҳақидаги хабарлардан кейин бир ҳафта ўтиб илк бор шанба куни омма олдида кўриниш берди.
Техасдаги Уэйко аэродромида ташкил этилган митингда минглаб тарафдорлари қаршисида чиқиш қилган Трамп Нью-Йоркда порноактриса Сторми Дэниелсга тўлов бўйича ўтказилаётган текширувни сўкиниш сўзлари билан атади.
«Нью-Йорк округ прокурори Вашингтондаги «адолатсизлик департаменти» ҳомийлиги ва кўрсатмалари остида менинг жиноят ҳам, роман ҳам бўлмаган ишимни текширмоқда», деган у.
Трамп унинг бутун шахсий, молиявий ва бизнес ҳаёти остин-устун бўлиб кетгани ва парчалангани, шу билан бирга ўзи Қўшма Штатлар тарихидаги энг бегуноҳ киши эканини айтган.
«Мен Учинчи жаҳон урушининг олдини оламан»
Россиянинг Украинага қарши уруши ҳақида гапирар экан, Трамп айнан унинг президентлиги даврида Украинага кенг кўламли қурол етказиб бериш бошланганини ёдга солиб ўтган. «Мен уларга юзлаб Javelin ракеталари бердим», деган у ва ундан олдинги президент Барак Обама Киевга фақат «ўйинчоқ қурол» - яъни ҳалокатли бўлмаган қуроллар етказиб берганини қўшимча қилган.
Трамп яна бир бор ўзининг у Оқ уйда эканида Путин Украинага ҳужум қилишга жазм эта олмагани, буни фақат Американинг ҳозирги президентининг заифлиги ва қатъиятсизлигини кўрганидан кейин ҳужум қилишга қарор қилгани ҳақидаги тезисини такрорлаган.
«Мен кетишим билан - ўша пайтдаги ҳалокатни истаганингизча аташингиз мумкин, - улар [россияликлар] [Украина билан чегарага] қўшинларини тўплай бошлади», деган Доналд Трамп.
2022 йил февралида Россиянинг кенг кўламли босқини бошланганида Трамп Путин «Украинанинг бир парчасини эгаллашни исташи» ҳақида гапирганди. Ҳозир эса, унинг сўзларига кўра, у мамлакатни тўлиқ олмагунча тўхтамайди.
Трамп қайта сайлангудек бўлса, бир лаҳзада Россиянинг Украинага босқинини тўхтатишни ваъда қилди. «Мен президент бўлганимда, бунга 24 соат ичида эришаман», дея ишонтирди у тафсилотларга тўхталмаган ҳолда.
«Сизнинг қаршингизда туриб мен қуйидагиларни айтиши мумкин бўлган ягона номзодман: мен Учинчи жаҳон урушини тўхтата оламан», дея эълон қилган собиқ президент йиғилганларнинг олқишлари остида.
«Президент Трампга қарши жодугар ови»
Сўнгги ҳафта давомида Трамп ўз сайти ва ижтимоий тармоқларида агар унга айблов қўйилса, «ўлим ва вайронгарлик» ҳақида тобора таҳдидли баёнотлар жойламоқда. Аммо унинг Техасдаги нутқи нохуш прогнозларсиз кечди.
BBC’нинг АҚШдаги мухбири Энтони Зуркернинг қайд этишича, митинг Трампнинг 2016 йилги президентлик кампаниясидаги карнавал йиғилишларни эслатиб юборган.
Собиқ президентнинг минглаб тарафдорлари чодирлар билан ўралган майдонни кезиб, «Худо, қурол ва Трамп» ҳамда «Трамп ғалаба қозонади» ёзувлари туширилган футболкаларни харид қилишган.
Кейин улар маҳаллий аэропортнинг асфальтланган майдонида йиғилиб, бир неча соат давомида, АВВА, Фрэнк Синатра ва Бон Жовининг қўшиқлари садолари остида собиқ президентнинг шахсий самолёти қўнишини кутиб туришган.
Рок юлдузи Тед Нюджент АҚШ миллий мадҳиясининг версиясини тўхталишлар билан ижро этди, у ҳар сафар танаффус қилганида 2021 йил 6 январида Капитолийни штурм қилган Трамп тарафдорларини «ноҳақ қамаган» федерал ҳукумат мулозимларига аталган сўзларини айтиб олди.
Йиғилганларга Флоридадан бўлган конгрессмен Мэтт Гетц ҳамда жоржиялик конгрессвумен Марджори Тейлор Грин мурожаат қилишди - улар яқин кунларда Трампга қарши жиноий айблов эълон қилиш бўйича бир қарорга келиши керак бўлган Ню-Йорк округ прокурори Элвин Брэгг манзилига қаратилган (у қадар юмшоқ бўлмаган) сўзларини айтишди.
«Бу ҳужум - 2024 йилги президентлик пойгасига таъсир кўрсатиш учун суд тизимимиздан очиқчасига фойдаланишдир, - деган Грин. - Бу президент Трампга қарши жодугар овидан бошқа нарса эмас ва у мутлақо айбсиз».
Уэйкодаги митинг арафасида қатор нашрлар ва Трампнинг рақиблари собиқ президент 2024 йилги кампаниясининг илк митингини нега 30 йил муқаддам федерал ҳукумат ва штат ҳукумати «Довуд тармоғи» (Branch Davidians) диний сектаси билан қуролли тўқнашувга киришган ва 86 киши ҳалок бўлган шаҳарда ўтказаётгани борасида саволлар беришди.
Аммо Техас вице-губернатори Дэн Патрик йиғилганларга Уэйконинг танланиши бу «катта шаҳар» экани билан боғлиқлигини айтди.
Президент самолёти тушдан кейин етиб келди ва Трампнинг 2016 ва 2020 йиллардаги президентлик кампаниясининг ўзига хос белгисига айланган аэродромга драматик қўнишни амалга оширди. Янги Trump Force One аэродромни Top Gun филми туфайли машҳур бўлиб кетган Danger Zone қўшиғи садолари остида айланди. Бу вақтда эса саҳнадаги рассом собиқ президентнинг портретини ишлади, унда у анча қовоғи солиқ кўринади.
Энтони Зуркернинг фикрича, рассом нуқтасига урган: Трамп ўз ютуқларини қанчалик ранг-баранг тасвирламасин ва ўз раҳбарлигидаги Америка қанчалик ёрқин бўлишини айтмасин, унинг юридик муаммолари - ва ҳибсга олиниши эҳтимоли - сайловолди ваъдаларидан кўра кўпроқ банд қилгани аниқ.
“Замин” янгиликларини “Facebook”да кузатиб боринг
