Президент Ражаб Тоййиб Эрдоған куни кеча Baykar ширкатига ташриф буюргани пайтида тушган сурати кенг муҳокамаларга сабаб бўлди. Гап шундаки, Туркия раҳбари ўзининг куёвига тегишли ширкат салонида Байрактар Қизилолма (Bayraktar KIZILELMA) учувчисиз парвоз аппарати олдида суратга тушган бўлиб, орқа фонда кўзга ташланиб турган Bayraktar TB3 дрони кўпчиликнинг эътиборини тортди. Шундан сўнг, ширкат Ўздемир Байрактар номли Миллий Технология Маркази салонида турган Bayraktar TB3 дрони ҳақида изоҳ беришга мажбур бўлди.
Baykar ширкатининг матбуот хизмати берган маълумотга кўра, мазкур дрон - Bayraktar TB3 учувчисиз парвоз аппарати 27 апрелдан 1 майгача Истанбул шаҳридаги Отатурк аэропортида бўлиб ўтадиган TEKNOFEST 2023 саноат фестивалида биринчи марта оммага намойиш этилади.
Baykar ширкати бошқарув кенгаши раиси Селчук Байрактар ва Байкар бош директори Ҳалук Байрактар Президент Эрдоғаннинг ташрифи чоғида амалга оширилган миллий лойиҳаларнинг сўнгги ҳолати ҳақида маълумот берди.
2022 йил 30 августда TEKNOFEST Қораденгизда биринчи марта омма олдида пайдо бўлган Туркиянинг биринчи учувчисиз парвоз аппарати "Байрактар Қизилолма" (Bayraktar KIZILELMA) 14 декабрда илк парвозини амалга оширганди.
Миллий ва дастлаб Байкар томонидан ишлаб чиқилган Bayraktar TB3 букланадиган қаноти туфайли қисқа учиш-қўниш йўлаги кемаларидан кўтарилиш ва қўниш қобилиятига эга дунёдаги биринчи дрон бўлади.
Bayraktar TB3 дронининг имкониятлари ҳам ушбу синфдаги учувчисиз ҳаво воситалари учун муҳим янгилик бўлади.
Кўриш масофасидан ташқарида ҳам алоқа ўрнатиш қобилиятига эга Bayraktar TB3ни жуда узоқ масофалардан бошқариш мумкин бўлади. Шунингдек, ушбу дрон разведка-кузатув, разведка ва ҳужум қилиш вазифаларини бажариб, Туркиянинг мудофаа кучига ижобий таъсир кўрсатади.
Фаолияти бошидан бери барча лойиҳаларини ўз молиявий манбалари ҳисобига амалга оширган Baykar ширкати барча даромадларининг 75 фоизини экспортдан олди.
Туркия экспортчилар ассамблеяси маълумотларига кўра, компания 2021 йилда мудофаа ва аэрокосмик саноатининг экспорт етакчисига айланди.
2022 йилда имзоланган шартномаларда экспорт даражаси 99,3 фоизни ташкил этган Baykar 1,18 миллиард долларлик экспорт қилди. Мудофаа ва аэрокосмик саноатининг энг йирик экспортчиси бўлган Baykar 2022 йилдаги айланма маблағи 1,4 миллиард долларга тенг бўлди.
Байрактар Қизилолма, Селчук Байрактар, Эрдоған, Дрон “Замин” янгиликларини “Telegram”да кузатиб боринг
