Тел-Авив, Қуддус ва бошқа шаҳарларда суд ислоҳотига қарши митинглар бўлиб ўтди. «Исроил давлатининг демократик характерини кафолатламагунимизча, биз кўчаларда қолишда давом этамиз», деган намойишчилар.
Бош вазир Бенямин Нетаняху мунозарали суд-ҳуқуқ ислоҳотини вақтинчалик тўхтатганини эълон қилганига қарамай, 450 мингдан ортиқ одам Исроилда яна намойишга чиқди. Митинглар 1 апрель, шанба куни Тел-Авив, Қуддус ва бошқа шаҳарларда бўлиб ўтди, энг йирик акцияларда 170 минг киши қатнашди, дея хабар беради DPA нашри.
Полиция билан алоҳида тўқнашувлар бўлиб, бир қанча намойишчилар ҳибсга олинган. Тел-Авив полицияси намойишчиларга қарши сув пуркагичлардан фойдаланган.
Йиғилганларнинг баъзилари ўзлари билан Исроил байроқлари ва ёзувлари бўлган плакатларни олиб келишди, баннерлардан бирида «Демократия ҳукуматдан кучли» деб ёзилган.
28 мартдан бери ҳукмрон коалиция ва мухолифат ислоҳот атрофидаги вазиятни ҳал қилиш мақсадида музокаралар олиб бормоқда. Шу билан бирга, мухолифатдаги сиёсатчилар Нетаняхунинг муросага эришиш ниятлари жиддийлигига ишонмаяпти.
«Нетаняхунинг намойишчиларни тинчлантиришга уриниши барбод бўлди», — дейди намойишчилар вакиллари. «Бугун тунда 445 мингдан ортиқ демократия тарафдори Исроил кўчаларига чиқди, бу Исроил тарихидаги энг йирик намойишлардан бири бўлди. Биз Исроил давлатининг демократик табиатига кафолат бермагунимизча кўчаларда қолишда давом этамиз», - дея таъкидлаган улар.
Исроилда оммавий норозилик намойишлари январь ойи ўрталаридан бери давом этмоқда. 27 март куни мамлакатда «Миллий фалаж ҳафталиги» эълон қилинди - суд ислоҳотларига қарши бир қатор намойишлар ва иш ташлашлар, уларга етакчи касалхоналар қўшила бошлади. Бироқ ўша куни, 27 март куни Бенямин Нетаняху қонун лойиҳасини «иккинчи ва учинчи ўқишни тўхтатиб туришга қарор қилганини» эълон қилди. Энди у апрель ойининг охиридан кечиктирмай парламентда овозга қўйилиши мумкин.
Суд-ҳуқуқ ислоҳоти Вазирлар Маҳкамасининг Олий суд судьяларини сайлаш бўйича ваколатларини кенгайтириш ва ушбу суд органининг ваколатларини чеклаши керак эди. Агар қонун лойиҳаси қабул қилинса, ҳукумат амалда судьяларни тайинлаш устидан тўлиқ назоратга эга бўларди. 20 февраль куни Исроил парламенти қонун лойиҳасини биринчи ўқишда маъқуллади.
Вашингтон Исроилда содир бўлаётган воқеалардан «жуда хавотирда» эканини маълум қилган. Оқ уй Исроил ҳукуматини оммавий норозиликлар фонида муросага келишга чақирди. «Биз Исроил раҳбарларини имкон қадар тезроқ муросага келишга чақиришда давом этамиз. Бу Исроил ва унинг барча фуқаролари учун энг яхши йўл деб ҳисоблаймиз», дейди Оқ уй Миллий хавфсизлик кенгаши сўзловчиси Адриен Ватсон ва АҚШ Исроилда хавфсизлик ва демократияни қўллаб-қувватлаши ўзгаришсиз қолаётганини қўшимча қилган.
“Замин” янгиликларини “Telegram”да кузатиб боринг
