Хитой раҳбари Си Цзиньпин ва Украина президенти Владимир Зеленский ўртасида алоқаларнинг йўқлиги Пекин урушда Москвани қўллаб-қувватлаяпти, дегани эмас. Бу ҳақда Хитойнинг Европа Иттифоқидаги элчиси Фу Цун The New York Times’га берган интервьюсида маълум қилди.
Элчининг сўзларига кўра, Хитой Россияни қурол-яроғ билан таъминламади ва Россиянинг Украина ҳудудларини, жумладан, Қрим ва Донбассни аннексия қилишга уринишларини тан олмади.
“Хитой босқинни қораламагани сабаби у Россиянинг НАТО тажовузига қарши мудофаа уруши ҳақидаги даъволарини тушунди ва асосий сабаблар Ғарб раҳбарлари айтганидан кўра мураккаброқ деб ҳисоблади”, — дейди Фу Цун.
Шунингдек, у Си Цзиньпин нега Украина президенти Владимир Зеленскийга ҳалигача қўнғироқ қилмаганини тушунтиришга ҳаракат қилди.
“Одамлар президентнинг қўнғироғига берилиб кетганини биламан. Си Цзиньпин Зеленский билан гаплашмаётгани Хитойнинг Украина масаласида Россия томонида эканини англатмайди”, — дейди элчи.
Дипломатнинг қўшимча қилишича, Хитой ва Украина ўртасида паст даражадаги алоқалар тез-тез содир бўлади.
“Замин” янгиликларини “Telegram”да кузатиб боринг
