Хавфсизлик кенгаши раиси ўринбосари Дмитрий Медведев, Россия, Европа, АҚШ, Осиё, Африка ва Лотин Америкаси, шунингдек, ўз фуқароларига ҳам «Украина керак эмас» ва шунинг учун у «йўқ бўлиб кетади», деб иддао қилган.
Медведевнинг таъкидлашича, Украинанинг мавжудлигидан ҳеч бир давлат, қитъалар манфаатдор эмас ва Украина аҳолисининг муносабати «45 миллиондан 20 дан бир оз кўпроғи у ерда қолган»лигида намоён бўлади.
Россия Федерациясининг собиқ президентининг фикрича, Украина 1991 йилда «миллионлаб ватандошлар» яшайдиган «Россиянинг бўлаклари» экан ва шу сабабли «Буюк Россия»ни қайта тузиш лозим эмиш.
«Сайёрамизда ҳеч кимга бундай Украина керак эмас. Шунинг учун у йўқ бўлади», - дея хулоса қилган Медведев.
Шуни эслаб ўтиш жоизки, 2010 йилда Медведев умуман бошқача гапирган, Россия ва Украина жуда яқин давлатлар эканлиги, ўзаро алоқалар даражасини шерикликка ўтказиш кераклигини айтган, шунингдек, Москва ва Киев ўртасидаги ҳамкорликни «жонлантириш»га чақирган эди.
