Украина НАТОдан мамлакатни альянсга қабул қилиш бўйича аниқ қадамлар ва «бу йўлда хавфсизлик кафолатларини» кутмоқда, деди Украина президенти Володимир Зеленский 20 апрель, пайшанба куни Киевда НАТО бош котиби Йенс Столтенберг билан қўшма матбуот анжуманида.
Июль ойида Вилнюсда бўлиб ўтадиган НАТО саммитига изоҳ берар экан, Зеленский унда иштирок этиш таклифи учун миннатдор эканлигини, бироқ «Украина ҳам тегишли таклифнома олиши»ни муҳим деб билишини айтди. «Украинани альянсга таклиф қилиш бўйича сиёсий қарорларга қарши бўлган бирорта ҳам объектив тўсиқ йўқ», — деди Зеленский.
«Биз қадамлар кутмоқдамиз. Олдинга қадамлар. Бизга бугунги муносабатларимиз форматидан кўра кўпроқ нарса керак. Улар бизни қурол-яроғ билан қўллаб-қувватлаётганини жуда қадрлаймиз. Лекин Украина қачон НАТОда бўлишини тушунмоқчимиз. Бу йўлда хавфсизлик ҳам кафолатланиши лозим», деди президент.
Столтенберг НАТО Украинани қўллаб-қувватлашини яна бир бор таъкидлади. «Биз босқинчиларга қарши қаҳрамонона курашда ва мамлакатингиз ҳимоясида сиз билан биргамиз. Эртага сиз Украина халқининг порлоқ келажаги йўлида қайта қураётган ва меҳнат қилаётганингизда биз сиз томонда бўламиз», - деди у. Альянс раҳбарининг сўзларига кўра, Украина «Евроатлантика оиласида ўз ўрнини топиши керак». «Украинанинг муносиб ўрни НАТОда. Буни вақт ўтиши билан қиламиз», - деди Столтенберг.
“Замин” янгиликларини “Telegram”да кузатиб боринг
