Россиянинг ўзига тегишли бўлган “Су-34” самолёти Белгородга авиабомба ташлаб юборди (видео)

Россиянинг Су-34 ҳарбий самолёти 20 апрель, пайшанба куни кечқурун Белгород марказий қисмига авиабомба ташлаб юборди.

 “20 апрель куни Ҳарбий ҳаво кучларига қарашли Су-34 самолётининг Белгород шаҳри узра парвози чоғида авиация ўқ-дорисининг ғайритабиий тушиши содир бўлди. Натижада турар жой биноларига шикаст етган, жабрланганлар йўқ. Ҳозирда тергов ҳаракатлари олиб борилмоқда”, — дейилади Россия Мудофаа вазирлиги хабарида.

Белгород вилояти губернатори Вячеслав Гладков ўзининг Telegram каналида ҳолат бўйича маълумот берган.

“Белгородда фавқулодда ҳолат. Портлаш содир бўлди. Дастлабки маълумотларга кўра, жабрланганлар йўқ. Марказий кўчалардан бирининг чорраҳасида радиуси 20 метрга тенг улкан ўра пайдо бўлди. Яқин-атрофдаги турар жой биносининг ойналари синган, портлаш натижасида тўхтаб турган бир нечта машина шикастланган ва электр узатиш линиялари ишдан чиққан”, — деб ёзади у.

Кейинроқ губернатор икки киши жабрланганини маълум қилди. Шунингдек, Шаладин кўчасидаги турар жой биносининг тўртта квартираси ҳам вайрон бўлган.