Бразилия президенти Луис Инасиу Лула да Силва Россиянинг Украинага бостириб киришини қоралади, бироқ «ақлдан озган урушда ҳеч ким тинчлик ҳақида гапирмаётганини айтди», деб хабар бермоқда Reuters.
Испанияга ташрифи чоғида да Силва яна бир бор «Украина ўз ҳудудини сақлаб қолиши» учун тинчлик йўлидаги саъй-ҳаракатларни кучайтириш тарафдори эканини айтди.
«Мен Европанинг бу урушга бўлган нуқтайи назарини тушунаман. Бир давлатнинг бошқа давлатга бостириб киришини қабул қилиб бўлмайди, лекин бу урушда тинчлик ҳақида гапирилаётганини кўрмаяпман», - деди у.
Аввалроқ Бразилия президенти Луис Инасиу Лула да Силва урушни тугатиш учун Қримни Россияга беришни таклиф қилганди.
Унинг сўзларига кўра, у Хитой етакчиси Си Жинпинг билан Украинанинг Қримдан «бош тортиши» ҳақидаги таклифни шахсан муҳокама қилмоқчи.
«Россия президенти Владимир Путин Украина ҳудудини қўлга кирита олмайди. Балки Қримни муҳокама қилармиз. Лекин у қўшимча равишда нима қўлга киритганини қайта кўриб чиқиши керак», - деди да Силва Бразилияда журналистлар билан учрашувда.
Украина Бразилия президентининг Россия агрессиясини тўхтатиш бўйича ечим топиш борасидаги саъй-ҳаракатларини қадрлайди, бироқ «ўз ҳудудлари билан савдолашмаслигини» эслатишга мажбур, дея маълум қилди ТИВ матбуот котиби Олег Николенко.
«Украина ерининг камида бир сантиметрини беришимиз учун ҳеч қандай ҳуқуқий, сиёсий ва маънавий сабаб йўқ. Украинанинг позицияси ўзгаришсиз қолмоқда: Украинада тинчликни тиклаш бўйича ҳар қандай воситачилик ҳаракатлари Бирлашган миллатлар ташкилоти низоми тамойилларига мувофиқ Украина яхлитлиги, суверенитетини ҳурмат қилиш ва ҳудуднинг тўлиқ тикланишига асосланган бўлиши керак», деб ёзди Николенко Facebook’да.
“Замин” янгиликларини “Telegram”да кузатиб боринг
