25 апрель куни АҚШ Демократик ва Республикачи партиялари конгрессменлари Конгресс Вакиллар палатасига резолюция лойиҳасини тақдим этдилар. Унда Украинадаги уруш 1991 йилги чегараларга қайтиши билан якунланиши кераклиги таъкидланган, деб ёзди Deutsche Welle.
«АҚШ сиёсати шундан иборатки, Украина урушда енгиб, 1991 йилги халқаро тан олинган чегаралари доирасига, яъни Қрим ва Россия томонидан аннексия қилинган бошқа ҳудудларга қайтиши керак», дейилади ҳужжатда.
Шунингдек, резолюция лойиҳасида Украина НАТО аъзоси бўлиши, Россия товон пули тўлаши, Кремль расмийлари эса ҳарбий жиноятларда айбланиб судланиши кераклиги айтилади.
Ҳужжат Конгресснинг Ҳелсинки комиссияси аъзолари бўлган республикачи Жо Уилсон ва демократ Стив Коэн томонидан тайёрланган. Ҳужжат овозга қўйилишидан олдин Вакиллар палатасининг Ташқи ишлар қўмитаси томонидан кўриб чиқилади.
Конгресснинг Ҳелсинки комиссияси 25 апрель куни Капитолий яқинида ўнлаб украиналик тарафдорлар йиғилгани, улар резолюциянинг Конгрессга киритилишини олқишлагани ҳақида хабар берди. Йиғилганлар орасида Украинанинг собиқ президенти Виктор Юшченко ҳам бор эди.
«Биз 1939 йил 1 сентябрдаги хатони такрорламаслигимиз керак», деди резолюция ҳаммуаллифи Жо Уилсон Адолф Ҳитлернинг Полшага бостириб кирганини эслаб.
Украина президенти девони раҳбари маслаҳатчиси Михаил Подоляк резолюциянинг киритилишини олқишлади. Yahoo News билан суҳбатда у ҳужжатни «ажойиб» деб атади.
“Замин” янгиликларини “Telegram”да кузатиб боринг
