Анқарада Қора денгиз иқтисодий ҳамкорлик ташкилоти Парламент ассамблеяси (PABSEC) йиғилишида Украина ва Россия делегацияси аъзолари ўртасида можаро келиб чиқди. Бу ҳақда Туркиянинг Anadolu агентлиги хабар берди.
Қайд қилинишича, Россия Давлат Думаси депутати Олга Тимофеева нутқи давомида Украина делегацияси аъзолари унинг орқасида ўз байроғини кўтаришга уриниб, аксилроссия шиорлар айтишни бошлаган.
Россия делегацияси аъзолари украиналикларни тўхтатмоқчи бўлганида жанжал келиб чиққан. Ассамблеяга раислик қилган Туркия парламенти спикери Мустафо Шентўп можарога аралашиб, йиғилиш иштирокчиларини тинчлантирган.
Тадбирдан кейинчалик украиналиклар ва россияликлар ўртасида янги, янада шиддатли жанжал чиққан. Россия делегатларидан бири украиналик депутатнинг қўлидан Украина байроғини тортиб олган. Бунга жавобан, украиналик депутат унинг юзига мушт туширишга уринган. Можарога Туркия парламенти қўриқчилари аралашиб, жанжалкашларни ажратган.
Қора денгиз иқтисодий ҳамкорлик ташкилоти Парламент ассамблеяси (PABSEC) 1993 йилда ташкил этилган парламентлараро ташкилотдир.
Ушбу платформада Қора денгиз минтақасининг 13 давлати парламентлар даражасида иқтисодий ва гуманитар ҳамкорликни ривожлантиришга ҳаракат қилмоқда.
Ташкилот Истанбулда жойлашган, бироқ унинг мажлислари навбатма-навбат иштирокчи давлатлар пойтахтида ўтказилади. Шу билан бирга, бир-бири билан урушаётган иштирокчи давлатлар (Украина-Россия, Арманистон-Озарбойжон) ўзига душман пойтахтида ўтказиладиган саммитларни бойкот қилмоқда.
“Замин” янгиликларини “Telegram”да кузатиб боринг
