Запорижжя областининг аннексия қилинган қисмида фронт чизиғига яқин жойлашган аҳоли яшаш манзилларидаги аҳолининг бир қисми «кўчирилиши» ҳақида эълон қилинди.
Украина қуролли кучлари яқин кунлар ёки соатлар ичида Запорожжя областида қарши ҳужумини бошлаши мумкин. Бу ҳақда регионнинг аннексия қилинган қисмига Россия томонидан тайинланган раҳбари Евгений Балицкий «Соловьев Live» эфирида маълум қилди.
Евгений Балицкий фронт чизиғига яқин жойлашган ҳудудлар аҳолисининг бир қисми кўчирилиши бошланишини эълон қилди.
Унинг сўзларига кўра, болалар ва ота-оналари, кекса ёшли кишилар ва ногиронлиги бор кишиларни «душман оловидан асраш»га қарор қилинган.
Унинг сўзларига кўра, сўнгги кунларда рақиб томон ҳарбий туташув чизиғига яқин жойлашган аҳоли яшаш пунктларини ўққа тутишни кучайтирган.
Қуйидаги 18 та аҳоли яшаш манзиллари аҳолисини «кўчириш» кўзда тутилган: Тимошовка, Смирново, Тарасовка, Орлянское, Молочанск, Куйбишево, Пришиб, Токмак, Малая Белозерка, Васильевка, Великая Белозерка, Днипрорудное, Михайловка, Каменка-Днипровская, Энергодар, Пологи, Конские Раздори, Розовка.
«Биз одамларнинг хавфсизлиги билан таваккал қила олмаймиз ва уюшган ҳолда кетиш учун воситалар, бир марталик тўловлар, жой ва егулик билан таъминлаймиз. Вақтинча жойлар регион ичида бўлади», — деган Балицкий.
Маълумотларга кўра, аҳолини Бердянск шаҳрига жойлаштириш режалаштирилмоқда.
“Замин” янгиликларини “Telegram”да кузатиб боринг
