Покистон мухолифати мамлакат собиқ бош вазири ва мухолифатдаги «Теҳрики Инсаф» партияси раҳбари Имрон Хоннинг ҳибсга олиниши ортидан оммавий норозилик намойишларига чақирди.
«Сизнинг вақтингиз келди, Покистон халқи. Хон ҳар доим сизни ҳимоя қилган, энди уни ҳимоя қилиш вақти келди», дейилади партия аккаунтидаги постда.
Хабар қилинишича, Имрон Хон “Ал-Қодир” иши бўйича Миллий ҳисобот бюроси томонидан ҳибсга олинган.
Аввалроқ иқтисодий разведка Имрон Хон, унинг рафиқаси ва «Теҳрик-и-Инсаф» етакчиларига нисбатан тергов бошлаган эди. Тергов маълумотларига кўра, улар биргаликда «Ал-Қодир университети»ни яратиш бўйича уюшма ташкил этишган ва бу Покистон бюджетига 50 миллиард рупий миқдорида зарар етказган.
Покистоннинг мухолиф “Теҳрики Инсаф” партияси тарафдорлари ва фаоллари сешанба куни мамлакатнинг йирик шаҳарларида собиқ бош вазир ва ЖМЖ раиси Имрон Хоннинг ҳибсга олинишига қарши норозилик намойишларини бошлади. Бу ҳақда сешанба куни партия матбуот хизмати хабар берди.
Унинг сўзларига кўра, намойишлар Исломобод, Пешовар, Харипур, Абботобод, Сиалкот, Файсалобод, Равалпинди, Лоҳур ва мамлакатнинг бошқа ҳудудларида бўлиб ўтмоқда.
Партия матбуот хизмати хабарига кўра, оммавий ахборот воситалари вакилларига намойишларни ёритишга рухсат берилмаган, партия тарафдорларини тарқатиб юбориш учун кучли таъсир қилиш усуллари, жумладан, кўздан ёш оқизувчи газ қўлланилмоқда.
“Замин” янгиликларини “Telegram”да кузатиб боринг
