Украинада урушнинг 444-куни: Запорижжяда қўлланаётган қўлбола қуроллар, Харкив метросидаги турнир (фото)

Украинада урушнинг 444-куни ўтди. Асосий маълумотлар:

• «Коммерсант» ўз манбасига таяниб, Брянск областида иккита Ми-8 вертолёти ва иккита қирувчи самолёт ҳалокатга учраганини хабар қилди. Нашр маълумотига кўра, уларнинг деярли барчаси бир вақтнинг ўзида уриб туширилган. Baza каналига кўра, жами тўққиз учувчи ҳалок бўлган.
• РФ мудофаа вазирлиги Брянск областидаги ҳодисалар бўйича ҳеч қандай изоҳ бермади. Регион губернатори фақат битта вертолёт ҳалокатини расман тасдиқлаган.
• Аннексия қилинган «ЛХР»да «отишмалар туфайли» мобил интернет ўчириб қўйилган.
• Германия Украинага уруш бошидан буён энг йирик ёрдам пакетини тақдим этади — Der Spiegel нашри ёзишича, 2,7 миллиард еврони ташкил этади.
• Володимир Зеленский Римда Италия президенти ва бош вазири, шунингдек Рим папаси билан учрашди.

Брянск областида россияликларнинг вертолётлари ва самолётлари ҳалокати

13 май куни Брянск областида бир вақтнинг ўзида бир неча ҳаво кемаси ҳалокатга учради. Регион губернатори Александр Богомаз камида битта вертолёт ҳалокатини тасдиқлаган. ТАСС агентлиги аниқлик киритишича, гап Ми-8 вертолёти ҳақида бормоқда, шунингдек Су-34 бомбардимончиси ҳалокатга учрагани айтилган.

Кейинроқ ОАВда ва телеграм-каналларда шу куни област ҳудудида жами тўртта учиш аппарати — иккита вертолёт ва иккита самолёт қулагани айтилди (бу маълумот расман тасдиқланмаган). Mash манбасига кўра, экипажнинг барча аъзолари ҳалок бўлган. Вертолётлар ва самолётлар ҳалокати сабаблари тўғрисида бир неча версиялар илгари сурилмоқда — кўчма зенит ракеталари билан қуролланган диверсантлардан тортиб Украина авиацияси зарбаларигача.

Константиновка ўққа тутилиши оқибатлари

Донецк областининг Константиновка шаҳри РФ қуролли кучлари томонидан ёппасига ўққа тутилиши давом этмоқда. 12 май кунги зарбалардан кейин бир киши тан жароҳати олиб, ўттизга яқин хусусий уйлар, иккита кўп қаватли турар жой биноси, иккита газ ўтказиш қувури ва битта дўкон биноси шикастланганди. 13 май куни РФ ҚК шаҳарни яна бир бор ўққа тутди. Натижада, Украина бош прокурори офиси хабарига кўра, тинч аҳоли вакилларидан икки киши ҳалок бўлган — 15 ёшли қиз ва 63 ёшли киши, шунингдек 10 киши яраланган. Шунингдек, фуқаролик инфратузилмалари шикастланган: кўп қаватли уйлар ва хусусий сектордаги уйлар, автомобилларга ёнилғи қуйиш шохобчаси, дорихона биноси ва бир неча дўконлар. Украина томонига кўра, шаҳар «Смерч» баравар ўт очиш реактив тизимидан ўққа тутилган.

Запорижжя областида Украина қуролли кучларининг қўлбола техникалари

Шушпанцерлар деб қўлда ясалган гибрид жанговар машиналарга айтилади — украинлар эскирган қисмлар ва машиналарни яроқли ҳолатга келтириш билан ҳам шуғулланмоқда. Reuters агентлигининг қуйидаги кадрларида —  Украина қуролли кучлари Запорижжя областидаги фронтда фойдаланаётган шушпанцерлар акс этган.

Харкивдаги метро станциясида бокс мусобақаси

Ленинград областида гастрономия фестивали

Ленинград областининг Новая Ладога шаҳрида ҳар йили ўтказиладиган «Корюшка идет!» номли, ҳисоб бўйича бешинчи гастрономия фестивали бошланди. Бу сафарги тадбирлар Ленинград қамали ёриб ўтилганининг 80 йиллигига бағишланган, аммо унда Украинадаги уруш мавзуси ҳам четлаб ўтилмади — масалан, фестивал меҳмонлари россиялик ҳарбий хизматчилар учун камуфляж тўрлари тўқишда иштирок этиши мумкин.

Шухрат Раззаков

«ЗАМИН.УЗ» муҳаррири