Ле Пен Путиннинг таъсири ҳақидаги айбловларни рад этди

^{Фото: Ludovic Marin/AFP/Getty Images}

Франциянинг ўнг қанот популистик “Миллий бирлашув” партияси етакчиси Марин Ле Пен Россия президенти Владимир Путиннинг унга нисбатан сиёсий таъсири бўйича айбловларни рад этди, деб хабар беради 24 май, чоршанба куни AFP ахборот агентлиги.

"Мен ҳеч қачон таъсир ўтказишга уриниш қурбони бўлмаганман", деди у парламентда ташқи сиёсий аралашув бўйича эшитувлар чоғида. Унинг партияси 2014 йилда Биринчи Чехия-Россия банкидан олган 9,4 миллион евро миқдоридаги кредитни шарҳлар экан, Ле Пен пулни ҳеч қандай сиёсий мажбуриятсиз олганини айтди. "Агар мен бирор нарсани (мажбуриятларни) ўз зиммамга олишим керак бўлса, мен унга имзо чекмаган бўлардим", деди у.

Ле Пеннинг сўзларига кўра, ўша пайтда француз банклари унинг партияси билан бизнес юритишни истамаган ва у хориждан маблағ излашга мажбур бўлган. “Мен Владимир Путиндан эмас, банкдан кредит олдим”, деди сиёсатчи.

“Миллий бирлашув” Биринчи Чехия-Россия банкидан 2014 йилда – Ле Пен қўллаб-қувватлаган Қримнинг Россияга қўшиб олинишидан олти ой ўтгач кредит олди. 2016 йилда Россия Марказий банки банкрот деб эълон қилинган Биринчи Чехия-Россия банки лицензиясини қайтариб олди. Кейин кредитга бўлган ҳуқуқлар Россия ҳарбий корхонаси "Авиазапчасти" ОАЖга ўтди, у совет даврида ташкил этилган компаниянинг вориси бўлиб, чет элда самолёт ускуналарига техник хизмат кўрсатиш билан шуғулланади.

Янгиликлар