Бразилия Олий суди 1990-1992 йилларда мамлакат президенти бўлган Фернанду Колор ди Мелуни порахўрлик ва пул ювишда айблаб, 8 йил-у 10 ойга озодликдан маҳрум қилди.
Бразилия собиқ президенти Фернанду Колор ди Мелу коррупция иши бўйича 8 йил-у 10 ойга қамоқ жазосига ҳукм қилинди. 31 май, чоршанба куни Бразилия Олий суди 73 ёшли собиқ давлат раҳбарини порахўрлик ва пул ювишда айбдор деб топди.
Суд 2010-2014 йилларда, президентликдан кетганидан кейин Сенат аъзоси бўлган Колор ди Мелу шартнома имзолаш имкони эвазига Petrobras нефть компанияси шуъба корхонаси бўлган BR Distribuidora энергетика компаниясидан катта миқдорда пора олганини исботланган ҳолат деб топди. Колор ди Мелу ҳукм тўлиқ эълон қилинганидан кейин апелляция бериши мумкин. Жараён 2014 йилда юзлаб сиёсатчилар, давлат хизматчилари ва бизнесменлар иштирок этган Lava Jato коррупция можароси билан боғлиқ.
Фернанду Колор ди Мелу 1989 йилда ҳарбий диктатура қулаганидан кейин Бразилиянинг тўғридан тўғри сайланган биринчи президенти бўлди ва 1990 йилда лавозимга киришган. 1992 йил декабрь ойида сайлов кампаниясига пул ундириш ва коррупция можароси фонида у истеъфога чиқди. 1994 йилда далил йўқлиги сабабли суд уни оқлади. Кейинчалик, Колор ди Мелу сиёсатга қайтди ва 2023 йил февралигача Алагоас штатидан сенатор бўлган. 2015 йилда суд собиқ президентга қарши янги тергов бошлади.
Бразилиянинг амалдаги президенти Луис Инасиу Лула да Силва коррупция ва пул ювишда айбланиб, қамоқ жазосини ўтаган эди. 580 кунлик қамоқдан сўнг Олий суд Лула да Силвага нисбатан чиқарилган ҳукмни расмий сабабларга кўра бекор қилди.
«Замин» янгиликларини «Вконтакти»да кузатиб боринг
