Ҳиндистондаги темирйўл ҳалокати тафсилотлари келтирилди

^{Фото: Reuters}

Ҳиндистонда учта поезд тўқнашиши оқибатида камида 275 киши ҳалок бўлди. Мамлакат бош вазири Нарендра Моди Ҳиндистон шарқидаги темирйўл ҳалокатига айбдорлар «қаттиқ жазоланиши»ни маълум қилди.

Ҳиндистонда учта поезд тўқнашган ҳудуддаги қутқарув ишлари якунланди - вайроналар орасидан барча қурбонлар ва жабрланганлар олиб чиқилган.

Сўнгги маълумотларга кўра, жума куни мамлакат шарқидаги Одиша штати ҳудудида йўловчи поезд ҳаракатсиз турган юк поездига урилиши, у издан чиқиб кетиб, қарама-қарши йўналишда ҳаракатланган бошқа йўловчи поездига урилиши оқибатида ҳалок бўлганлар сони 275 нафарни ташкил этмоқда.

Расмийлар бундан аввалроқ қурбонлар сони 288 нафарлигини хабар қилганди, аммо кейинроқ рақамлар ўзгарди - Одиша штати бош котиби Прадип Женнинг хабар беришича, ҳисоблаш вақтида айрим жасадлар иккитага баҳолангани маълум бўлди.

Шунингдек, 1200 нафарга яқин киши турли даражада тан жароҳатлари олган. Оғир ярадорлар Одиша штатидаги, воқеа жойидан тахминан уч соатли масофада бўлган йирик шифохонага ётқизилган. Айни вақтда бу ерга 220 нафарга яқин жабрланувчи олиб келинган, уларнинг сони ошишда давом этади.

Мамлакат бош вазири Нарендра Моди воқеа жойига ташриф буюрган. У шифохонада жабрланганлар билан ҳам учрашган ва унинг ҳукумати уларнинг даъволаниши учун барча ишни қилишига ваъда берган.

Ҳозирга қадар Баласор округидаги поездлар тўқнашувига нима сабаб бўлгани аниқ эмас - бу жорий асрда Ҳиндистондаги энг даҳшатли темирйўл ҳалокати сифатида баҳоланмоқда.

«Дастлабки маълумотларга кўра, авария сигнал носозлиги оқибатида рўй берган», дея хабар қилади Жануби-Шарқий темирйўлнинг жамоатчилик билан алоқалар бўйича бош мутахассиси К. С. Ананд.

Тахминларга кўра, икки йўловчи поезд бортида икки мингга яқин йўловчи бўлган.

Расмийларнинг сўзларига кўра, Калкуттадан Ченнайга ҳаракатланган Coromandel Express поездининг бир неча вагони тахминан соат 19:00 (13:30 GMT) да ҳаракатсиз турган юк поезди билан тўқнашувдан кейин релсдан чиқиб кетган. Экспресс қандай қилиб юк поезди билан битта изга тушиб қолгани маълум эмас.

Шундан сўнг, Coromandel Express поездининг бир неча поезди қарама-қарши йўналишга ўтиб қолган. Қарама-қарши йўналишда ҳаракатланган, Йесвантпурдан Хауруга кетаётган Howrah Superfast Express поезди ўз йўлига чиқиб қолган вагонларга келиб тўқнашган.

«Coromandel Express асосий линия бўйлаб ҳаракатланиши керак эди, аммо бунинг ўрнига ҳалқа линиясига сигнал берилган ва поезд бу йўлда тўхтаб турган юк поездига бориб урилган. Унинг вагонлари иккала томондан релсларга қулаган, бу эса Howrah Superfast поезди вагонлари ҳам издан чиқиб кетишига олиб келган», деган Ананд.

Темирйўлларнинг шахси сир тутилишини сўраган ходими маҳаллий нашрларга айтишича, дастлабки текширувлар Coromandel Express асосий йўлни тарк этиб, ҳалқа йўлга - поездлар тураргоҳи сифатида фойдаланиладиган йўлга ўтгани ва 130 км/соат тезликда ҳаракатланиб, шу йўлда турган юк поездига бориб урилганини кўрсатган.

Тўқнашув натижасида Coromandel Express локомотиви ва дастлабки тўрт ёки беш вагони релсдан чиқиб, ағдарилган ва қарама-қарши йўналишда 115 км/соат тезликда ҳаракатланган Howrah Superfast Express поездининг охирги икки ёки уч поездига урилган.

Икки йўловчи поезд машинистлари яраланган, аммо ҳалокатдан омон қолишган.

Оғир техникага эга ишчилар шикастланган релсларни, вайрон бўлган поездлар ва электр кабелларни демонтаж қилишга киришган. Темирйўл вазирлиги твиттерида хабар қилинишича, қутқарув ишларига мингдан ортиқ киши жалб этилган. «Мақсад - чоршанба куни тонггача барча тиклаш ишларини тугатиб, йўлни ишлашга тайёр ҳолатга келтириш», деган темирйўл вазири Ашвини Вайшнав.

Ҳиндистон тарихидаги энг йирик поезд ҳалокатлари:

• 1981 йил июнь: Циклон вақтида вагонлари лимитдан ортиқ миқдорда йўловчилар билан тўлган поезднинг тўққиз вагони дарёга қулаши оқибатида 800 киши ҳалок бўлган.
• 1995 йил август: Деҳлидан 200 км масофада икки поезд тўқнашиши оқибатида камида 350 киши ҳалок бўлган.
• 1999 йил август: Калкутта яқинида икки поезд тўқнашган, камида 285 киши ҳалок бўлган.
• 2005 йил октябр: жанубдаги Андхра-Прадеш штатида поезд издан чиқиб кетиши оқибатида 77 киши ҳалок бўлган.
• 2016 йил ноябр: Канпур шаҳри яқинида тезюрар поезднинг 14 вагони издан чиқиб кетиши оқибатида 150 киши ҳалок бўлиб, яна шунча киши яраланган.
• 2017 йил январ: жанубдаги Андхра-Прадеш штатида йўловчи поездининг бир нечта вагонлари рельсдан чиқиб кетиши оқибатида камида 41 киши ҳалок бўлди.

Ҳиндистон темирйўллар тармоғи - дунёдаги энг йирикларидан биридир. «Ҳинд темирйўллари» давлат компаниясига кўра, компания ҳар куни 13 млн атрофида йўловчи ташийди, аммо темирйўл инфратузилмасидаги кўплаб объектлар модернизацияга муҳтож.

Йилнинг бу вақтида поездлар аксар ҳолларда сиғимидан ортиқроқ йўловчилар билан тўлган бўлади, чунки кўпчилик мактаб таътиллари вақтида саёҳатга чиқади.