Россиянинг Украинадаги урушда ғалаба қозониш истиқболлари ҳатто уни қўллаб-қувватлаган рус элитасининг вакиллари томонидан ҳам паст баҳоланди. Бу ҳақда Bloomberg хабар берди.
Нашрга кўра, Россия элитасини Путиннинг Украинадаги уруш истиқболлари ҳақида чуқур тушкун кайфият қуршамоқда ва ҳатто энг оптимистик одамлар ҳам “музлатилган” конфликтни Кремль учун энг яхши натижа деб билади.
Сиёсий ва бизнес элитасининг кўплари урушдан чарчаган ва унинг тугашини хоҳлайди, лекин улар Путин жангни тўхтатишига шубҳа қилади.
Вазият билан таниш бўлган етти киши бу бўйича маълумот бериб, мавзу нозик бўлгани учун шахсини ошкор қилмасликни сўраган.
“Ҳеч ким президентга босқин сабабли қарши бўлишни истамаса-да, унинг етакчилигига бўлган ишончни шубҳа остига қўйди”, — дейди улар.
Икки манбанинг айтишича, энг мақбул натижа йил охиридаги музокаралар бўларди ва бу Путинга Украина ҳудудининг бир қисмини босиб олган ҳолда русларга ғалабани эълон қилиш имконини берарди.
Босқиндан кейин мамлакатни тарк этган Россия ҳукуматининг собиқ маслаҳатчиси ва ҳозирда Вена шаҳрида жойлашган Ре:Russia таҳлил марказига раҳбарлик қилаётган Кирилл Рогов фикрича, рус элитаси “бемаъни урушда айбдор бўлишдан қўрқади”.
Унинг сўзларига кўра, Россия элитаси орасида Путин урушда ғалаба қозонмаслиги ҳақидаги тушунча “ажабланарли даражада кенг тарқалган”.
Гарчи Россия армияси Киевни уруш бошида қўлга кирита олмаганидан кейин ғалаба нималигини аниқ билмаса-да, Путиннинг ўзи ва унинг юқори мартабали мулозимлари Россия ғалаба қозонишини таъкидламоқда.
Бешта манба Россия президенти урушни тугатиш истагини билдирмаганини илгари сурди. Тўрт манбанинг таъкидлашича, элитанинг аксарияти вазиятга ҳеч қандай таъсир ўтказа олмаслигига амин.
“Урушнинг охири кўринмаган, Россия расмийлари ва миллиардерлари кўп йиллик халқаро изоляция ва Кремлга қарамлик кучайиб бораётганини билади, чунки Путин бизнесни уруш ҳаракатларини қўллаб-қувватлашга ундамоқда ва атрофидагиларга лавозимни тарк этишни тақиқламоқда”, — дейди Bloomberg.
“Замин” янгиликларини “Одноклассники”да кузатиб боринг
