Аргентинада стюардесса собиқ йигитидан аламини олиш учун самолётни портлатиб юбориш билан таҳдид қилди

^{Фото: Ижтимоий тармоқлар}

Аргентинада Даниэла Карбоне исмли стюардесса собиқ севгилиси ва унинг маъшуқаси мамлакатни тарк этиб, Майами шаҳрига учиб кетишига йўл қўймаслик мақсадида самолётда бомба борлиги ҳақида ёлғон хабар берди.

Агар айбдор деб топилса, аёл олти йилгача қамоқ жазосига ҳукм қилиниши мумкин. Карбоне овозни ўзгартирувчи дастур ёрдамида самолёт учувчисига қўнғироқ қилган ва самолётни портлатиб юбориш билан таҳдид қилган.

“Капитанга айтинг, биз унинг самолётига учта бомба жойлаштирдик. Самолётни текширинг, чунки у ҳавода парчаланиб кетиши мумкин”, — деди Aerolineas Argentinas стюардессаси.

Карбоненинг собиқ йигити Пичо ва унинг ҳозирги севгилиси ҳам рейсда борт кузатувчиси бўлиб ишлайди. Улар беш йил давомида учрашиб юришган. Даниэла собиқ севгилиси уни бошқа, ёшроқ стюардесса сабаб ташлаб кетганини кечира олмади.

Ҳодиса оқибатида самолётдан 270 нафар йўловчи эвакуация қилинган. Полиция Карбонени Буэнос-Айресдаги халқаро аэропортида ҳибсга олди. Унга жамоатчиликни қўрқитиш ва давлат хизматларига тўсқинлик қилиш айби қўйилмоқда.

Aerolineas Argentinas авиакомпанияси парвозлар жадвалини мажбурий ўзгартириш туфайли бир миллион долларга яқин зарар кўрди.