Украина президенти Владимир Зеленский 18 июнь якуни бўйича йўллаган видеомурожаатида Киевдаги Patriot зенит-ракета комплексларининг бирортаси ҳам йўқ қилинмаганини айтди.
“Россияда ким бизнинг Patriot'ларимиз йўқ қилингани ҳақида айтгани аҳамиятсиз, уларнинг ҳаммаси турибди, ҳаммаси ишлаяпти”, — деди у.
16 июнь куни Россия президенти Владимир Путин Санкт-Петербург халқаро иқтисодий форумида сўзлаган нутқида россиялик ҳарбийлар Киев яқинида бешта Patriot комплексини йўқ қилгани ҳақида айтганди. Бир ой олдин Россия Мудофаа вазирлиги “Кинжал” гипертовушли ракетаси ёрдамида Киевдаги бешта Патриот ва кўп функцияли радар станцияси йўқ қилинганини хабар берган.
CNN ва Reuters агентликлари Россия томонидан йўқ қилингани айтилган Патриот комплекси аслида минимал зарар кўргани ва Украина ҳудудида таъмирланиши мумкинлиги ҳақида ёзди. Кейинроқ Пентагон комплекс хизматга қайтарилганини маълум қилди.
9 июнь куни АҚШ Украинага 2 миллиард долларлик янги ҳарбий ёрдам пакетини эълон қилганди. Хусусан, пакет доирасида ажратилган пул Hawk ракета қурилмалари ва ўқ-дорилар, шунингдек, Patriot ҳаво ҳужумидан мудофаа тизми учун илғор ракеталарни сотиб олишга сарфланади.
Россия ва Украина уруши “Замин” янгиликларини “Инстаграм”да кузатиб боринг
