Россиялик мухолифатчи сиёсатчи Алексей Навалний ўзига нисбатан “экстремизм” иши бўйича биринчи суд мажлиси ўтказилган куни “урушга ва Путинга қарши” кампания бошлаётганини маълум қилди. Бу ҳақда мухолифатчи ижтимоий тармоқларида ёзди.
Сиёсатчининг сўзларига кўра, унинг тарафдорлари халқни урушга ва у билан боғлиқ барча нарсага қарши қўйиш учун “узоқ, машаққатли, аммо принципиал муҳим кампания” олиб боришни режалаштирмоқда.
Мухолифатчи потенциал катта аудиторияга умид қилмоқда. “Ҳар бешинчи кишининг қариндошлари ёки дўстлари бу урушда ҳалок бўлган. Бу рақамлар, афсуски, янада кўпайиб, жамоатчилик онгини ўзгартиради”, — дейди у. “Бунга уйга қайтган ўн минглаб ярадорлар ва ногиронлар, ҳаммасини ўз кўзи билан кўрган юз минглаб сафарбар қилинганлар қўшилади”.
Навалний олдинда қилинадиган ишлар кўплигини, “қийин вазифани бажаришга тайёр кўнгилли тарғиботчиларни” ёллашини эълон қилди.
Экстремизм иши якунида Алексей Навалний 30 йилгача озодликдан маҳрум этилиши мумкин. 26 апрель куни Басманний судида йиғилиш бўлиб ўтганди, унда Алексей Навалнийга экстремизм бўйича жиноий иш материаллари билан танишиб чиқиш учун 10 кун вақт беришга қарор қилинган. Суд тергов сирини рўкач қилиб, тингловчилар ва матбуот учун йиғилишни ёпиб қўйган. Навалний ва унинг ҳимоячиси айтишича, жиноий иш 196 банддан иборат.
- Алексей Навалний 2021 йилдан бери Владимир вилоятидаги 6-сонли ахлоқ тузатиш колониясида жазо ўтамоқда. 2022 йилнинг март ойида у фирибгарлик ва судга ҳурматсизлик қилганликда айбланиб, яна тўққиз йилга қаттиқ тартибли колонияга ҳукм қилинган.
- 2022 йил октябрь ойида сиёсатчи ўзига қарши янги жиноий иш қўзғатилганини маълум қилди. Россия Тергов қўмитаси уни терроризм ва экстремизмни тарғиб қилиш, экстремистик фаолиятни молиялаштириш ва натсизмни реабилитация қилишда айблади.
