Хитой етакчиси Си Цзиньпин АҚШ ўз ҳаво ҳудудида Хитой шарларини аниқлаб, уларни уриб туширганидан эсанкираб қолган, чунки у Пекиннинг бу миссиясидан бехабар бўлган, деди АҚШ президенти Жо Байден Калифорниядаги маблағ йиғиш тадбирида. Бу ҳақда Reuters хабар берди.
“Си Цзиньпин мен жосуслик аппарати бор ўша ҳаво шарини уриб туширганимдан жуда норози бўлганига сабаб — у шар ҳақида билмаган” — деди Байден. “Нима бўлаётганини билмаслик эса диктаторларга ёқмайди”.
Пекин ҳозирча Байденнинг сўзларига муносабат билдирмади.
Байден Пекин Вашингтон билан муносабатларни яхшилашни истаётганига ишонч билдирди, бироқ унинг фикрича, илиқлашув учун вақт керак. Байден “Ҳозир муҳими — у (Си Цзиньпин) яна муносабатларга киришмоқчи бўлиб тургани” деб айтди.
20 июнь куни АҚШ Давлат котиби Энтони Блинкен Хитойга ташрифини якунлади. Сафари давомида у ХХР ташқи ишлар вазири Син Ган, Хитой дипломатияси куратори Ван Йи, кейин эса Си Цзиньпин билан учрашди. Блинкен сўнгги беш йил ичида Хитойга ташриф буюрган энг юқори мартабали АҚШ расмийсига айланди. Томонлар суҳбат очиқ ва мазмунли ўтганини таъкидлади. Пекин бугунги кунда икки давлат ўртасидаги муносабатлар энг паст даражада эканини қайд этди.
Блинкен “жосус” шарлар мавзусини ўтмишда қолдиришни таклиф қилди ва Пекинга ташрифини АҚШ—Хитой муносабатларини барқарорлаштиришда муҳим қадам деб атади.
