Қутқарувчилар сайёҳларни «Титаник» лайнери чўкиб кетган жойга олиб тушаётган пайтда йўқолиб қолган хусусий «Титан» сувости кемасини қидириш зонасида шовқинларни қайд этди. Канаданинг Boeing P-3 Poseidon патруль самолёти томонидан шовқинлар аниқланган, масофадан бошқариладиган сувости транспорт воситалари у ерга кўчирилган, бироқ қидирув «салбий натижалар» берган, деб хабар қилди 21 июнь, чоршанба куни АҚШ Соҳилни қўриқлаш хизмати. Канада самолёти маълумотлари кейинги таҳлил қилиш учун АҚШ денгиз флоти мутахассисларига топширилди.
Аввалроқ CNN телекомпанияси ва Rolling Stone нашри ҳукуматнинг ички маълумотларига таяниб, Канаданинг P-3 самолёти қутқарув операцияси олиб борилаётган ҳудудда «акустик алоқа»ни аниқлагани ҳақида хабар берган эди - бу 20 июнь куни ҳар ярим соатда эшитилган тақиллатишга ўхшаш овоз. Ушбу маълумотларга кўра, товуш қачон ва қанча вақт давомида эшитилгани аниқ эмас.
Ҳукумат хабарларидан бирида айтилишича, қидирув ҳудудига тўрт соатдан кейин қўшимча гидролокация ускуналари ўрнатилганда (сигналлар аниқланганидан кейин) овоз эшитилган ва «бу омон қолганларнинг умидвор эканлигидан далолат беради».
19 июнь куни Атлантика шимолида «Титан» хусусий сувости кемаси ғойиб бўлди. Бортда беш киши, жумладан, британиялик миллиардер Хэмиш Хардинг ва йўқолган сувости кемасига эгалик қилувчи OceanGate асосчиси Стоктон Раш бор.
«Титан» «Титаник» чўкиб кетган жойга икки соатлик шўнғишни бошлаган, аммо экспедициянинг асосий кемаси билан алоқани йўқотган. Батискафда (чуқур сувостида юрадиган аппарат) кислород билан таъминлаш 96 соатга мўлжалланган. Мутахассислар фикрича, «Титан»даги электр таъминоти тизими ишламай қолган, қисқа туташув содир бўлган ёки қурилма «Титаник»ка жуда яқин келиб, чўкиб кетган лайнер конструкцияларига тегиб кетган бўлиши мумкин.
Американинг NBC телеканали батискаф эгаси Стоктон Рашнинг 2020 йилда берган интервьюсида «Титан»да «циклик чарчоқ» белгилари намоён бўлаётганини айтганига эътибор қаратди. Шу сабабли, қурилма фақат уч минг метргача чуқурликка тушиши мумкин эди. Айни пайтда, «Титаник»нинг вайроналари тахминан 4000 метр чуқурликда.
Қидирув операциясининг майдони 20 минг квадрат километрга яқин ҳудудни қамраб олган.
«Замин» янгиликларини «Вконтакти»да кузатиб боринг
