Портлаш туфайли Париж марказидаги Лотин кварталидаги бир неча биноларда ёнғин келиб чиқди. Ҳодиса сабаби сифатида бир неча версия кўриб чиқилмоқда, уларнинг асосийси – газ портлаши билан боғлиқ. Маҳаллий расмийларга кўра, 37 киши жароҳатланган, улардан тўрт нафари оғир аҳволда.
Уйлардан бирининг фасади кўча томондан қулаган, бир неча уй ёниб кетган.
Мамлакат ички ишлар вазири Жералд Дарманин маиший газ портлаши V округидаги Сен-Жак кўчасида — Люксембург боғи ва Сорбонна яқинида, католик таълим тизими офиси ҳамда дизайнерлик студияси жойлашган уйда рўй берганини маълум қилди.
Газ портлаши ҳақида бешинчи округ мэри Флоренс Берту ва мэр ўринбосари Эдуард Сивел ҳам маълумот берган.
Воқеа жойига етиб келган Париж прокурори Лора Беко кузатув камерасидан олинган маълумотга кўра, портлаш бино ичкарисида рўй берганини тасдиқлаган.
Портлашга гувоҳ бўлганларнинг айтишича, кўчада ўткир газ ҳиди келаётганди. Аммо Париж полицияси вакили портлаш сабаби айнан газ бўлгани ҳақида хулоса чиқаришга ҳали эрта эканини айтган.
BFM TV телеканали ўт ўчириш хизматлари алангани ўчиришга уринаётгани кадрларини намойиш этган, парижликлар эса твиттерда шаҳарнинг катта қисмидан кўриниб турган улкан тутун устуни акс этган суратларни жойлашган.
Журналист Оливье Галци BFM TV эфирида қўшни бино фасади қандай қилиб «тўлиғича қулаб тушгани»ни кўрганини айтган.
Полиция одамларни бу ҳудуддан узоқроқ юришга чақирган.
«Бу хаос», — дея гувоҳлардан бири Кристофер Галоненинг сўзларини келтирган Reuters агентлиги.
Париждаги Сен-Мишел булварида жойлашган Тоғ мактаби талабаси Le Parisien газетасига ҳикоя қилишича, у кучли гумбурлашни эшитган ва 20 ёки 30 метр баландликка кўтарилган улкан олов шарини кўрган. У ҳам ҳудудда кучли газ ҳидини сезганини айтган.
Бошқа бир гувоҳ Антуан Брушо BBC учун интервюсида кучли овоз келган маҳалда уйда бўлганини айтган: «Мен бошимни деразадан чиқардим ва ўша томонга қарадим, кейин эса улкан тутун булутини кўрдим, у ерга яқинроқ борганимда қулаган бинони кўрдим, у ерда ҳаммаси ёнаётганди».
