Украина президентининг рафиқаси Елена Зеленская The Jerusalem Post нашрига берган интервьюсида уруш пайтида нималар билан бандлиги ҳамда хавфсизлик нуқтаи назаридан турмуш ўртоғидан алоҳида яшашини айтди.
Зеленскаянинг сўзларига кўра, у ҳар куни ишлаш учун офисга боради, шу билан бирга турмуш ўртоғидан алоҳида яшайди: Владимир Зеленский хавфсизлик нуқтаи назаридан офисда тунайди, Елена эса болаларнинг олдига қайтади.
“Омадимиз келса, офисда тушликда учрашамиз. Ҳозирда ҳеч биримизда ҳордиқ чиқариш ёки кўнгил очиш имконияти йўқ”, — дея қўшимча қилди Зеленская.
Бундан ташқари, у офисда руҳий саломатлик дастурлари, мактаблардаги тушлик сифатини ошириш ва оилавий зўравонлик қурбонларига ёрдам бериш каби лойиҳалар устида ишлаётганини айтди. Биринчи хоним, шунингдек, интервьюлар беради, телефон ва видео қўнғироқларни амалга оширади.
Маълумот учун Елена Зеленская 1978 йил февралда Кривой Рог шаҳрида туғилган. У бўлажак турмуш ўртоғи билан Кривой Рог гимназиясида параллел синфларда ўқиган, аммо улар кейинроқ, Елена қурилиш университети талабаси бўлганида ва Владимир Зеленский ҳуқуқшунослик дипломини олганида гаплашишни бошлаган. Жуфтлик 2003 йилда турмуш қуришидан олдин саккиз йил учрашиб юрган. Уларнинг икки фарзанди бор: Александра (2004 йил 15 июлда туғилган) ва Кирил (2013 йил 21 январда туғилган).
Украинада уруш бошланишидан олдин Зеленская жамоат олдида фаол эмасди, лекин 2022 йилнинг февраль ойидан бери у кўплаб Ғарб сиёсатчилари ва уларнинг рафиқалари билан учрашишга муваффақ бўлди, сентябрда эса БМТ бош котиби Антониу Гутерриш билан кўришди.
“Замин” янгиликларини “Twitter”да кузатиб боринг
