Трамп: “Украина урушни тўхтатиш учун Россияга ҳудудининг бир қисмини беришга мажбур бўлиши мумкин”

^{Фото: “РБК”}

АҚШнинг 45-президенти Дональд Трамп Reuters агентлигига берган интервьюсида Россия президенти Владимир Путин “Вагнер” исёни туфайли “бир оз заифлашганини”, АҚШ учун Россия ва Украина ўртасидаги тинчлик музокараларида воситачилик қилиш вақти келганини айтди.

“Мен одамлар бу бемаъни урушда ўлиб кетишларини тўхтатишни хоҳлайман”, — деди Трамп.

Унга кўра, Украина расмийлари урушни тўхтатиш учун ҳудудининг бир қисмини Россияга беришга мажбур бўлиши мумкин. Шу билан бирга, Трамп ўз ерларини ҳимоя қилаётган украиналиклар “катта мақтовга лойиқ” эканини таъкидлади.

Ўйлайманки, улар (украиналиклар) ўзи эришган нарсаларнинг катта қисмини ўзларида сақлашга ҳақли, Россия ҳам бунга рози бўлади деб ўйлайман. Бизга тўғри воситачи ёки музокарачи керак, ҳозир унақаси йўқ. Менимча, айни пайтда АҚШ қилиши керак бўлган энг муҳим иш — тинчлик ўрнатиш, Россия ва Украинани бир стол атрофига йиғишдир. Буни қилса бўлади. Ҳозир шундай қилиш, икки томонни бирлаштириш ва тинчлик ўрнатиш вақти келди.

Дональд Трампнинг фикрича, “Вагнер” асосчиси Евгений Пригожин томонидан уюштирилган исёнга уриниш Владимир Путинга зарар етказган.

“У (Путин) ҳалиям ўз ўрнида, ҳалиям кучли, дейиш мумкин, лекин у, албатта, бир оз заифлашган, ҳеч бўлмаганда кўпчиликнинг тасаввурида”, — деди Трамп.

АҚШ собиқ президентининг таъкидлашича, агар Путин Россияда ҳокимиятда қолмаса, унинг ўрнини ким эгаллаши ноаниқ, муқобил одам “яхшироқ бўлиши ҳам, ундан баттарроқ бўлиши ҳам мумкин”.

Украина ҳукумати урушни тугатишнинг асосий шарти Россия қўшинларининг Украина ҳудудидан олиб чиқилиши деб ҳисоблайди. Россия расмийлари эса тинчликка эришиш учун Украина ҳукумати ҳудудларининг бир қисми аннексия қилинишини тан олиши кераклигини таъкидлаган.

2017—2021 йилларда АҚШни бошқарган Дональд Трамп 2024 йилги сайловларда Республикачилар партиясидан президентликка номзод бўлишни режалаштирмоқда. АҚШдаги сўровномалар Республикачилар партиясидан президентликка номзодлар орасида Трампнинг устунлигини кўрсатмоқда.