Virgin Galactic космик самолёти ўзининг биринчи тижорий суборбитал парвозини амалга оширди, деб хабар берди компания твиттерда.
VSS Unity космик самолёти бортида уч нафар йўловчи ва беш нафар Virgin Galactic компаниясининг ходими бўлган. Йўловчилар Италия Ҳарбий-ҳаво кучларининг икки полковниги ва Италия Миллий тадқиқот кенгаши муҳандиси эди.
Парвоз Нью-Мексико штатидаги “Америка” космодромидан амалга оширилди. WК2 ташувчи самолёти VSS Unity космопланини тахминан 15 километр баландликка кўтарди, шундан сўнг космик кема ундан ажралиб чиқди. Кейин у деярли вертикал равишда тахминан 80 километр баландликка кўтарилди, бир неча дақиқани вазнсизликда ўтказиб пасайишни бошлади. Парвоз бошланганидан тахминан бир ярим соат ўтгач, кема хавфсиз қўнди.
Sky News аниқлик киритишича, космик самолётнинг навбатдаги учирилиши 2023 йил августига режалаштирилган. Шундан сўнг Virgin Galactic ҳар ой парвоз қилишни режалаштирмоқда.
Al Jazeera нашрининг ёзишича, компания бўлажак рейслар учун 800 га яқин чипта сотган – улардан 600 таси 2005-2014-йилларда 200 мингдан 250 минг долларгача бўлган нархларда сотилган. Кейинги йилларда яна 200 та ўрин ажратилди. Уларнинг нархи 450 минг долларга етди.
Virgin Galactic бир неча йиллардан бери суборбитал туристик парвозларни ташкил этишга ҳаракат қилмоқда. Компания 2010-йилларнинг ўрталарида биринчи сайёҳларни парвозга жўнатишни режалаштирган эди, бироқ космик кемани ишлаб чиқиш ва синовдан ўтказиш кечиктирилди.
2021 йил июл ойида Virgin Galactic компаниясининг эгаси Ричард Бренсон VSS Unity бортида муваффақиятли суборбитал парвозни амалга оширган эди.
“Замин” янгиликларини “Youtube”да кузатиб боринг
