Япониялик тадқиқот гуруҳи одамларга янги тишларни ўстиришга имкон берувчи илғор дори яратишда муваффақиятга эришди. Препаратнинг клиник синовлари 2024 йилнинг июлида бошланиши керак, деб ёзди Mainichi Shimbun.
«Янги тишларни ўстириш ғояси ҳар бир тиш шифокорининг орзусидир. Мен аспирантурада ўқиётганимда бу борада ишлаганман. Мен буни амалга оширишимга ишончим комил эди», деди Кацу Такаҳаши, Осака шаҳридаги Китано тиббиёт тадқиқот институти стоматология ва оғиз-жағ жарроҳлиги бўлими бошлиғи.
Дори туғма омиллар (анодонтия) туфайли илдиз тишлари тўлиқ бўлмаган одамлар учун мўлжалланган. Бу аҳолининг тахминан 1 фоизини ташкил қилади.
Япон олимлари ўз тадқиқотида махсус генни аниқлади, унинг йўқлиги сичқонларда тишлар сонининг кўпайишига олиб келди. Ушбу ген томонидан синтез қилинадиган USAG-1 оқсили тишларнинг ўсишини чеклаган.
Такаҳаши тадқиқот гуруҳи оқсил функциясини блокировка қилишга қодир нейтраллаштирувчи антитана ишлаб чиқди. 2018 йилда ўтказилган тажрибада тишлари туғма кам бўлган сичқонларга янги дори берилди, натижада тишлар ўсиб чиқди.
Тадқиқотчилар препаратни сассиқкузанларда синаб кўришди. Натижада, уларда қўшимча еттинчи олд тиш ўсиб чиқди. У мавжуд бўлганлар орасида ўсиб, бир хил шаклга эга бўлгани сабабли, олимлар препарат учинчи авлод тишларининг шаклланишига олиб келади деб хулоса қилишмоқда.
Ҳозирда препаратни инсонда синаб кўриш учун тайёргарлик ишлари олиб борилмоқда. Унинг организмга зарарли таъсири йўқлиги тасдиқланиши биланоқ, анодонтия билан оғриган 2 ёшдан 6 ёшгача бўлган болаларни даволашга йўналтирилади.
Агар жараён муваффақиятли бўлса, стоматология соҳасида катта ўзгаришга олиб келиши мумкин. Кариес ёки тишлар эрозиясидан азият чекадиганлар янги, учинчи тўплам тишларини ўстириш орқали протезлардан воз кечиш имкониятига эга бўлади.
“Замин” янгиликларини “Одноклассники”да кузатиб боринг
