Японияда одамлар учун ноёб музлаткич яратилди

Японияда инсонларни қисқа вақт ичида салқинлатишга мўлжалланган Do Hiemon Box номли ноёб қурилма ишлаб чиқилди. Japan Today хабарига кўра, ташқи кўриниши музлаткични эслатувчи ушбу кабина фақат бир кишига мўлжалланган бўлиб, уни SDRS компанияси яратган.

Қурилма ичидаги ҳарорат 15 даража Цельсийда сақланади. Ўриндиққа ўтирилганда эса тахминан 5 даражагача совитилган ҳаво бош, бўйин ва елка томон йўналтирилади. Компания маълум қилишича, беш дақиқа ичида инсон ўзини анча салқин ҳис қилади, 10 дақиқа давомида эса тана ҳарорати пасайиб, иссиқдан чарчаш аломатлари енгиллашади.

Do Hiemon Box айниқса қурилиш объектлари, заводлар, омборхоналар ва очиқ ҳавода ишлайдиганлар учун мўлжалланган. У ҳаво оқими ва совитишнинг учта режимига эга. Ҳаддан ташқари совиб кетишнинг олдини олиш мақсадида қурилма 20 дақиқадан кейин автоматик равишда ўчади. Шунингдек, у ғилдираклар билан жиҳозланган бўлиб, бир жойдан бошқа жойга осон кўчирилади. Қурилма электр тармоғида ишлайди ва кўчма кондиционерга нисбатан тахминан икки баравар кам энергия сарфлайди.

Ҳозирда Do Hiemon Box Японияда саноат ускуналари дистрибюторлари орқали сотувга чиқарилган. Унинг стандарт модели 1,5 миллион иена (тахминан 9 200 доллар) этиб белгиланган.

Бу ихтиро Японияда кузатилаётган аномал иссиқ фонида тақдим этилди. Мамлакатда 40 даражага етадиган кунлар учун «кокушоби» («шафқатсиз иссиқ кун»), 35 даражадан юқори ҳарорат кузатиладиган кунлар учун эса «мошоби» («экстремал иссиқ кун») атамалари қўлланилади. 21 июль куни 914 та кузатув нуқтасининг қарийб 300 тасида «мошоби» қайд этилган, Токиода эса эркакларга ишга шортида келиш тавсия этилган.