Россия ядро каллаклари аллақачон Беларусга олиб келинган, деди мамлакат раҳбари Александр Лукашенко 6 июль, пайшанба куни Минскда хорижий ва беларуслик журналистлар билан учрашувда.
«Ядро қуролларини жойлаштириш пунктлари бир ой олдин тўлиқ тайёр эди. Уларнинг аксарияти кўчирилди ва Беларусда жойлашган. Йил охиригача, аммо, менимча, ундан ҳам олдин биз бунинг учун мўлжалланган жанговар каллакларни тўлиқ кўчирамиз», деб хабар берди у ҳамда жанговар каллаклар «ер орқали» кўчирилмаганини, икки давлат уларнинг жойлаштирилишини биргаликда назорат қилишини қўшимча қилди. «Биз қуролли кучларнинг ҳозирги таркибига ўзимиз хизмат қила олмаймиз. Шунинг учун ҳамма нарсани биргаликда қиляпмиз», - деди у.
Лукашенконинг таъкидлашича, Беларус ғарб давлатларига ҳужум қилмоқчи эмас. «Қўллашдан хавотир олманг: биз АҚШ, Германия ёки Буюк Британияга ҳужум қилмоқчи эмасмиз. Биз ҳеч кимга ядровий қурол билан ҳужум қилмаймиз», деди у ва қурол Беларусда мудофаа мақсадларида жойлаштирилганини қўшимча қилди. «Бизга тегманг. Ядро қуролини эса унутинг. Лекин Беларусга қарши тажовуз қилсангиз, жавоб бир зумда бўлади. Мақсадлар аниқ», - дея огоҳлантирди Лукашенко.
25 март куни Россия президенти Владимир Путин Беларусда Россия ядро қуролини жойлаштириш режасини эълон қилди. 16 июнь куни Путин Россиянинг биринчи ядро қуроли Беларусга етказилганини ва бутун партия йил охиригача етиб боришини таъкидлади. Москва Минскка жанговар каллаклардан ташқари ядровий қурол ташувчиси бўлиши мумкин бўлган «Искандар» ракета тизимини ҳам топширди. Беларуслик учувчилар Россияда ўқитилди.
«Замин» янгиликларини «Вконтакти»да кузатиб боринг
