Мультимиллиардер Илон Маскка тегишли Twitter микроблоглар хизмати Facebook ва Instagram’нинг бош компанияси Meta корпорациясини Twitter рақобатчиси - Threads’ни ишга туширгани учун судга бериш билан таҳдид қилмоқда. Бу ҳақда 6 июль, пайшанба куни Semafor интернет портали Twitter манфаатларини ҳимоя қилувчи адвокат Алекс Спиронинг Meta асосчиси Марк Цукербергга йўллаган хатига таяниб хабар берди.
Мактубда адвокат Meta Маск компаниясининг «тижорат сирлари ва бошқа ўта нозик маълумотларига» кириш имконига эга бўлган бир қанча собиқ Twitter ходимларини ишга олганини даъво қилади. Айтилишича, бу ходимлардан Twitter билан рақобатлаша оладиган нусха кўчириш иловасини яратишда мақсадли фойдаланилган.
Threads ижтимоий тармоғи Meta томонидан 6 июлга ўтар кечаси 100 га яқин мамлакатда ишга туширилди. Twitter каби, у қисқа матнли хабарларни юбориш имконини беради. Цукербергнинг сўзларига кўра, илова бир неча соат ичида 30 миллион марта юклаб олинган.
Бугунги кунга қадар Threads Twitter’нинг энг яқин рақобатчиси ҳисобланади, чунки у жуда кўп сонли Instagram фойдаланувчи аккаунтларининг маълумотлар базасидан фойдаланиши мумкин. Европа Иттифоқида ижтимоий тармоқ ҳали ишламаяпти.
“Замин” янгиликларини “Facebook”да кузатиб боринг
