Эрдўған Украинани НАТО аъзоси бўлишга муносиб деб атади

^{Эрдўған ва Зеленский учрашуви. Фото: president.gov.ua}

Туркия президенти Ражаб Тоййиб Эрдўған Истанбулда Украина президенти Володимир Зеленский билан музокаралардан сўнг Украинани НАТО аъзоси бўлишига муносиб, деб таъкидлади.

«Анадўлу» агентлигининг ёзишича, Туркия президенти Зеленский билан музокаралардан сўнг «Украина, шубҳасиз, НАТО аъзоси бўлишга муносиб», деган.

Унинг сўзларига кўра, Туркия Россия-Украина можаросини ҳал қилиш учун барча саъй-ҳаракаларни ишга солган, бир неча бор «Украина ҳудудий яхлитлиги, суверенитети ва мустақиллигини қўллаб-қувватлаган».

«Биз, шунингдек, сиёсий, иқтисодий, ҳуманитар ва техник соҳаларда муайян кўмакларни кўрсатиб, Украина билан бирдамлигимизни амалда намоён этдик», — деган Эрдўған.

Эрдўған, шунингдек, Туркия шарофати билан ғалла битими тузилганини ҳам ёдга олган.

«Умид қиламанки, бир йил ичида муҳтожларга 33 миллион тонна ғалла етказилишини таъминлаган мазкур ташаббус 17 июл куни яна узайтирилади», — деган Туркия етакчиси.

Аввалроқ РФ ТИВ раҳбари ўринбосари Сергей Вершинин ғалла битими келишувга риоя қилинмаётгани сабабли 18 июл куни ниҳояланиши мумкинлиги ҳақида баёнот берган эди.

Бундан ташқари, Ражаб Тоййиб Эрдўған август ойида мамлакатга Россия президенти Владимир Путин ташриф буюришини ҳам эълон қилди. Эрдўғанга кўра, музокара мавзуларидан бири асирлар алмашиш бўлади.

«Биз айниқса асирлар алмашиш масаласида Украина томонидан президент Зеленскийни эшитдик. Мен бу масалани жаноб Путин билан муҳокама қилганман, келгуси ойда жаноб Путин Туркияга ташриф буюради. Бизда бу масалани юзма-юз муҳокама қилиш имконияти бўлади», — деган Эрдўған.

Украина ўтган йилнинг сентябр ойида НАТОга тезлаштирилган тартибда аъзо бўлиш учун ариза берган эди. НАТО бош котиби Йенс Столтенберг июн ойида Украина учун «НАТО эшиклари доимо очиқ» эканини маълум қилган, бироқ унинг алянсга аъзо бўлиш масаласи Украинанинг «ғалабаси»дан кейингина муҳокама қилиш учун имконли бўлишини таъкидлаган.

Ўз навбатида, АҚШ президенти Жо Байден CNN телекомпаниясига берган интервюсида «Украинани НАТО оиласига қабул қилишда айни дамда алянсда бирдамлик борлиги»дан шубҳа қилишини билдирган эди. Россиянинг кенг миқёсли босқини бартараф этилмагунга қадар Украинани Шимолий Атлантика алянсига қўшиш НАТОни можарога аралашувига олиб келиши мумкин, деган Америка етакчиси.