«Азов» командирлари Туркиядан Украинага қайтарилди, Россия норозилик билдирди

^{Фото: Telegram / V_Zelenskiy_official}

Украина президенти Володимир Зеленский Мариуполдаги «Азовстал» заводини ҳимоя қилган «Азов» полкининг беш нафар ҳарбий қўмондони Туркиядан қайтарилганини маълум қилди. Улар 2022 йил сентябрида асирлар алмашинуви доирасида озод қилиниб, президент Ражаб Тоййиб Эрдўған билан келишилган ҳолда уруш тугагунига қадар уй қамоғида бўлиши учун Туркияга жўнатилган эди.

Зеленский Истанбулда Эрдўған билан музокара ўтказди ва Денис Прокопенко, Святослав Паламар, Сергей Волинский, Олег Хоменко ва Денис Шлега озодликка чиқарилганини айтди.

«Биз Туркиядан уйга қайтяпмиз ва қаҳрамонларимизни ҳам қайтаряпмиз», деб ёзди Зеленский ижтимоий тармоқда.

«Азов» полки қўмондонларининг Туркиядан Украинага қайтиши амалдаги келишув шартларини бузиш ҳисобланади. Бу ҳақда Россия президенти матбуот котиби Дмитрий Песков маълум қилди.

Унинг сўзларига кўра, қайтиш шартларини Анқара ҳам, Киев ҳам бузган. Келишув шартларига кўра, «Азов» жангчилари уруш тугагунга қадар Туркияда қолиши керак эди.

2022 йил май ойида «Азовстал»ни ҳимоя қилган 2,5 минг украина аскари россияликларга таслим бўлди. 7 июн куни улардан мингдан ортиғи тергов учун Россияга юборилди. Кейинчалик, уларнинг бир қисми Ражаб Тоййиб Эрдўған билан келишилган ҳолда уруш тугагунига қадар уй қамоғида бўлиши учун Туркияга жўнатилган эди.

Янгиликлар