Полша Ички хавфсизлик агентлиги (ИХА) «Россия разведкаси учун ишлаган» яна бир тармоқ аъзосини қўлга олди. Бу ҳақда 10 июль, душанба куни Полша ички ишлар ва маъмурият вазири Мариуш Каминский маълум қилди.
Қўлга олинган шахс Украина фуқароси бўлиб, 2019 йилдан бери Полшада яшайди. «Гумонланувчи ҳарбий иншоотлар ва денгиз портларини кузатган», деди вазир. Унинг сўзларига кўра, эркак Россия томонидан тизимли равишда пул олган. Бу тергов доирасидаги ўн бешинчи ушланган шахс, дея қўшимча қилди Каминский.
Аввалроқ, 30 июнь куни Полша миллий прокуратураси ИХА ходимлари Россия фуқароси ва «биринчи лига клуби спортчиси»ни қўлга олгани ҳақида хабар берган эди. ОАВ хабарларига кўра, гап ҳоккей клуби ҳақида боряпти.
Эркак уюшган жиноий гуруҳда иштирок этиш ва Полша зарарига хорижий разведка хизмати манфаатларини кўзлаб ҳаракат қилганлик моддалари бўйича айбланмоқда.
Тергов маълумотларига кўра, у, хусусан, бир нечта воеводликларда муҳим инфратузилмани ўрганиш билан шуғулланган, раҳбарларни разведка натижалари тўғрисида хабардор қилган ва бунинг учун мукофот олган. Россиялик Полшада 2021 йил октябр ойидан бери бўлган. У ҳибсга олинган ва 10 йилгача қамоқ жазосига ҳукм қилиниши мумкин. 13 июнь куни Люблин туман суди эркакни уч ойга ҳибсга олишга қарор қилди, дея хабар беради «Польское радио».
Терговнинг фикрича, тармоқдан Россия махсус хизматлари, хусусан, темирйўл изларини кузатиш учун фойдаланган. Гуруҳ, шунингдек, НАТО, Полша ва ҳукумат сиёсатига қарши ташвиқот олиб бориши ва Россия разведкаси буюртмасига кўра диверсиялар тайёрлаши керак эди, дея таъкидлаб ўтди «Польское радио».
“Замин” янгиликларини “Facebook”да кузатиб боринг
