“Вагнер” асосчиси Евгений Пригожин ўзи уюштирган ҳарбий исёндан кейин Россия президенти Владимир Путин билан учрашди, деб хабар бермоқда Франциянинг Liberation газетаси Ғарб разведкасидаги манбаларга таяниб.
Нашрнинг ёзишича, Пригожин 1 июль куни Кремлга чақирилган. У ерда у нафақат Путин билан, балки Россия гвардияси раҳбари Виктор Золотов ва Ташқи разведка хизмати раҳбари Сергей Наришкин билан ҳам учрашган. Газетанинг ёзишича, Пригожинга “Вагнер” командирлари ҳамроҳлик қилган.
Нашр ушбу учрашувнинг бошқа тафсилотларини келтирмади.
Кремль ушбу маълумотни тасдиқлади. Путиннинг матбуот котиби Дмитрий Песковнинг таъкидлашича, учрашув ҳақиқатан бўлган, фақат 1 июлда эмас, исёндан беш кун ўтиб, 29 июнда.
“Учрашув тахминан 3 соат давом этди, унда ‘Вагнер’ отрядлари командирлари ҳам иштирок этди, жами 35 киши. Президент бўлиб ўтган воқеаларга ўз баҳосини берди ва ‘Вагнер’ вакилларига ишга жойлашиш имкониятларини таклиф қилди”, — дейилади Песковнинг изоҳида.
23 июнь куни “Вагнер” раҳбари Евгений Пригожин ҳарбий исён эълон қилди, бу бир кун давом этди. Исёнчилар Россия пойтахти томонга бир неча юз километр юрди, аммо 24 июнь куни кечқурун Пригожин ортга қайтишни маълум қилди.
Бу қарор Пригожин ва Беларусь президенти Александр Лукашенко ўртасидаги музокаралардан сўнг қабул қилинган, унда Пригожиндан “Беларусга кетиш” сўралган.
6 июль куни Лукашенко Пригожин Беларусь ҳудудида эмас, Санкт-Петербургда эканини айтди.
“Замин” янгиликларини “Facebook”да кузатиб боринг
