Зеленский: Байден Украинадаги урушни беш дақиқада тугатиши мумкин

^{Фото: ABC News}

АҚШ президенти Жо Байден агар Киев Россия назоратидаги ҳудудлардан воз кечса, Украинадаги урушга беш дақиқада барҳам бериши мумкин, бироқ Киев бундай йўлга рози бўлмайди, деди президент Володимир Зеленский ABC News телеканалига.

Шу тариқа у 2024 йил ноябрида бўлиб ўтадиган сайловларда ғалаба қозонса, президентлигининг биринчи кунида урушга барҳам беришни ваъда қилаётган собиқ президент Доналд Трампнинг баёнотларига изоҳ берди.

«Урушни тугатиш истаги ажойиб. Аммо бу истак қандайдир ҳақиқий тажрибага асосланган бўлиши керак. Доналд Трамп ўз даврида бундай 24 соатга эга эди. Биз уруш ҳолатида эдик, албатта тўлиқ уруш эмас, лекин биз уруш ҳолатида эдик. Менимча, унда (урушнинг олдини олиш учун) имконият бор эди. Лекин у бошқа муҳим нарсалар ҳақида ўйлаган кўринади», деди Зеленский.

Украина президенти фикрига кўра, Байден ҳам бундай имкониятга эга.

«Агар биз Украина ҳисобига урушни тугатиш, яъни ҳудудларимизни бериб қўйиш ҳақида гапирадиган бўлсак, менимча, шу йўл билан Байден урушни ҳатто беш дақиқада тугатиши мумкин. Аммо биз бунга рози бўлмаймиз», деди Зеленский.

Шунингдек, Украина раҳбари АҚШ президенти сайловидан кейин ҳам иккита партиянинг қўллаб-қувватлаши сақланиб қолиши муҳимлигини айтди. Аммо, унинг таъкидлашича, ёрдамни қисқартириш бўйича баъзи сиёсатчилардан «хавфли сигналлар» бор.

АҚШ собиқ президенти Доналд Трамп Россия-Украина урушига 24 соат ичида барҳам бериши мумкинлигини бир неча бор таъкидлаган. У буни қандай қилишини ошкор этмади. Трамп, шунингдек, 10 дақиқа ичида европалик иттифоқчиларни Украинага кўпроқ пул сарфлашга кўндира олишини айтди.

Россия ва Украина уруши Янгиликлар