НАТОга аъзо давлатлар ташкилотнинг 11 июль, сешанба куни Вилнюсда бўлиб ўтган саммитида Россия билан уруш тугаганидан сўнг Украинага иттифоққа қўшилиш имкониятини таъминлаш бўйича қарорга келди.
Саммит баёнотида қайд этилганидек, агар НАТОга аъзо давлатлар бунинг учун шартлар бажарилган деб ҳисобласа, Украина Шимолий Атлантика альянсига қўшилиш таклифини олади. «Биз Украина НАТОга аъзо бўлишини тасдиқладик ва аъзолик бўйича ҳаракатлар режасини бекор қилиш тўғрисида қарор қабул қилдик», деди ташкилот бош котиби Йенс Столтенберг матбуот анжуманида.
Столтенбергнинг сўзларига кўра, альянсга аъзо барча давлатлар Россиянинг бу давлатга қарши уруши давом этар экан, Украина НАТОга тўлақонли аъзо бўла олмайди, деган фикрда.
НАТО Украинага альянсга қўшилиш учун расмий таклиф юбориш имкониятини боғлаётган шартлар қаторида коррупцияга қарши кураш, шунингдек, қуролли кучларни модернизация қилиш соҳасидаги ишлар ҳам бор. Киевни бу йўлда қўллаб-қувватлаш учун НАТО Украина қуролли кучлари ва Шимолий Атлантика альянси кучлари ўртасида «тўлиқ ўзаро ҳамкорлик»ни таъминлайдиган кўп йиллик ёрдам дастурини келишиб олди, деди Столтенберг.
Ташкилот саммити арафасида Украина президенти Володимир Зеленский НАТОни Украинани ўз сафига қабул қилишга тайёрлиги ҳақида «аниқ сигнал» йўқлиги борасида танқид қилди. Бу танқидга муносабат билдирган Йенс Столтенберг 11 июль куни альянс Украинанинг аъзолиги масаласида «ҳеч қачон бундан кучли сўз эшитмаганини» таъкидлади. Шу билан бирга, Украинага тегишли таклифномани тақдим этиш муддати айтилмаган.
«Биз Украина НАТОга аъзо бўлишини яна бир бор таъкидладик ва альянсга аъзолик бўйича ҳаракатлар режасига қўйиладиган талабларни бекор қилишга келишиб олдик. Бу Украинанинг НАТОга аъзо бўлиш йўлини ўзгартиради, икки босқичли жараён ўрнига бир босқичли жараён пайдо бўлди», - деди Столтенберг. Бошқа нарсалар қаторида, саммитда НАТО-Украина кенгашини ташкил этиш бўйича келишиб олинди, дея қўшимча қилди у.
“Замин” янгиликларини “Twitter”да кузатиб боринг
