Россия ташқи разведкасида ишлаганликда гумон қилинган ҳакерлар Украинадаги элчихоналардаги ўнлаб дипломатларнинг компьютерларини бузиб киришга уринди. Бу ҳақда 12 июль, чоршанба куни Palo Alto Networks компаниясининг киберхавфсизлик билан шуғулланувчи Unit 42 бўлими таҳлилчилари ҳисоботи билан танишган Reuters агентлиги хабар берди. Ҳужжатда айтилишича, йирик жосуслик фаолияти Киевдаги 80 га яқин хорижий ваколатхоналарнинг камида 22 тасида ишлаётган дипломатларга қаратилган.
Киберхавфсизлик бўйича экспертлар маълумотига кўра, 2023 йил апрель ойи ўрталарида полшалик дипломат турли элчихоналарга Киевда жойлашган BMW 5-серияли фойдаланилган седани сотилиши ҳақидаги эълонни электрон почта орқали юборган. APT29 ёки Cozy Bear номи билан танилган ҳакерлар рекламани тутиб олиб, унга зарарли дастурларни киритган ва уни эски BMW суратлари альбоми сифатида яширган.
Ушбу фотосуратларни очишга уриниш натижасида фойдаланувчининг компьютери зарарланган, дейилади хабарда. Улар, шунингдек, одамларни ўз қурилмаларига масофадан кириш имконини берувчи зарарли дастурларни юклаб олишга ундаш учун полшалик дипломат айтган автомобил нархини пасайтирган ва Киевда жойлашган бошқа ўнлаб хорижий дипломатларга эълон юборган.
Reuters агентлиги ҳакерлик ҳужумига учраган 22 элчихона билан боғланди, улардан 21 таси изоҳ бермади. Қайси элчихоналарга ҳакерлик ҳужуми содир этилгани аниқ эмас. Вашингтон «бу фаолиятдан хабардор ҳамда Кибер ва технология хавфсизлиги бошқармаси таҳлили асосида у бўлим тизимлари ёки ҳисобларига таъсир қилмаган деган хулосага келди», деди АҚШ Давлат департаменти вакили.
2021 йилда Америка ва Британия разведка агентликлари APT29’ни Россия Ташқи разведка хизмати филиали сифатида аниқлаган. 2023 йил апрелида Полша контрразведкаси ва киберхавфсизлик идоралари худди шу гуруҳ НАТО, Европа Иттифоқи ва Африка давлатларига қарши «кенг кўламли разведка кампанияси» олиб бораётгани ҳақида огоҳлантирган эди.
Unit 42 тадқиқотчилари сохта автомобиль рекламасини APT29билан боғлашга муваффақ бўлди, чунки ҳакерлар илгари қўллаган баъзи воситалар ва усуллардан қайта фойдаланган.
«Дипломатик миссиялар ҳар доим жосуслик учун қимматли нишон бўлиб қолади», дейилади Unit 42 ҳисоботида. «Украинада ҳарбий ҳаракатлар бошланганидан 16 ой ўтиб, Украина атрофидаги разведка ва унинг иттифоқчиларининг дипломатик саъй-ҳаракатлари Россия ҳукумати учун биринчи ўринда турибди», дейилди ҳужжатда.
“Замин” янгиликларини “Youtube”да кузатиб боринг
