Украина ҳарбийлари ва чегарачилари ўн кун ичида Беларус билан чегарадаги 30 та майдонда танкка қарши миналарни ўрнатди. Бу ҳақда Украина бирлашган Қуролли кучлари қўмондони Сергей Наев маълум қилди.
«Шимолий қўшнимиз билан давлат чегараси бизга узоқ вақт давомида фуқаролик кўринишида керак бўлмаслигини тушуниб турибмиз. Чунки чегаранинг нариги томонида дўстларимиз йўқ. Шунинг учун вазифа қўйилди: чегара чизиғини душман учун ўтиб бўлмас ҳолга келтириш», деди Наев.
«Вагнер» исёни ва ушбу қуролли гуруҳ вакилларининг Беларусга кўчиб ўтиши мумкинлиги ҳақидаги хабардан сўнг, Украина раҳбарияти армия қўмондонлигига Беларус билан чегарани мустаҳкамлаш бўйича кўрсатма берганини эълон қилди.
Генерал Наев сўзларига кўра, июнь ойининг сўнгги ўн кунлигида чегарадаги 30 та майдонга танкка қарши 5,8 минг мина ўрнатилган. Шунингдек, беш километрга яқин хандақ ва олти ярим километр танкка қарши ўра қазилган.
Украина ва Беларус ўртасидаги чегара узунлиги 1084 км. Украина Россиянинг кенг кўламли босқинидан бери уни мустаҳкамлаб, миналаштириб келмоқда. 2022 йил 24 февраль куни рус қўшинлари Украина-Беларус чегарасининг шарқий қисми орқали бостириб киришди, аммо бир ойдан кейин бу ҳудудларини тарк этишган эди.
“Замин” янгиликларини “Twitter”да кузатиб боринг
