18 июлга ўтар кечаси Украина ҳарбийлари Одесса осмонида Россиянинг 6 та “Калибр” ракетасини, шунингдек, Одесса ва Николаев вилоятларида 25 та Shahed камикадзе дронларини уриб туширди, деб хабар бермоқда Украина Қуролли кучларининг “Жануб” тезкор қўмондонлиги.
Одесса вилояти маъмурияти раҳбари Олег Кипернинг айтишича, Одессада уриб туширилган ракеталарнинг бўлаклари порт инфратузилмаси объектлари ва бир нечта хусусий уйларга зарар етказган. Улардан бирида тинч фуқаро жароҳатланган.
Николаевда ҳужум оқибатида саноат объектида зарба қайд этилди, у ерда ёнғин бошланди, дейди Николаев вилояти маъмурияти раҳбари Виталий Ким. Қурбонлар йўқ.
Украина президенти офисининг раҳбари Андрей Ермак Россиянинг Украина жанубий вилоятларига ҳужумини Украина донини экспорт қилишига халал беришга уриниш деб баҳолади.
18 июлга ўтар кечаси Украина ҳарбийлари жами Россиянинг 6 та “Калибр” ракетасини, 31 та Shahed-136/131 дронини ва битта разведкачи самолётини уриб туширди, дейди Украина Қуролли кучлари Ҳарбий ҳаво кучлари қўмондонлиги. Хабарда таъкидланганидек, ракеталар ва учувчисиз учоқларнинг аксарияти Одесса ва Николаев вилоятларида, қолганлари Донецк, Харьков ва Днепропетровск вилоятларида уриб туширилган.
Аввалроқ Россия томонидан аннексия қилинган Қрим раҳбари яриморол шарқига 30 га яқин дрон ҳужум қилгани ҳақида хабар берганди. Қайд этилишича, дронлар уриб туширилган ёки зарарсизлантирилган.
Россия ва Украина уруши «Замин» янгиликларини «Вконтакти»да кузатиб боринг
