Грузиянинг ҳибсдаги собиқ президенти Михаил Саакашвили Россия президенти Владимир Путин 2004 йилдаёқ Украинага бостириб киришни режалаштирганини айтди. Саакашвилининг очиқ хати The Times нашрида чоп этилди.
Саакашвилининг ёзишича, Россия президенти у билан Кремлда биринчи марта учрашув ўтказганида ўзининг ҳудудий амбициялари ҳақида гапирган.
Шундан сўнг Саакашвили Германияга йўл олган ва бу ҳақда канцлер Герхард Шредерга айтган, аммо канцлер буни “дарҳол Путинга етказган”.
Собиқ президентнинг сўзларига кўра, у Грузияга қилинган ҳужумдан кейин ҳам Ғарб сиёсатчиларини Россиядан келаётган хавф ҳақида огоҳлантирган, бироқ улар бунга муносабат билдирмаган.
Саакашвили таниб бўлмас даражада озиб кетган
3 июль куни Михаил Саакашвили 2007 йилдаги митингни куч билан бостириш иши бўйича суд мажлисида видеоалоқа орқали иштирок этганидан сўнг Грузия собиқ президентининг соғлиғига халқаро эътибор яна кучайди. Судланувчи жуда заиф ва озиб кетган ҳолда кўриниш берди.
Ўша куни Украина президенти Владимир Зеленский “Россия Украина фуқароси Михаил Саакашвилини Грузия ҳукуматининг қўли билан ўлдирмоқда”, дея Грузияни уни Украинага даволаниш учун юборишга чақирди. У шунингдек, Украина Ташқи ишлар вазирлигига Грузия элчиси Георгий Закарашвилининг Тбилисида маслаҳатлашувлар ўтказиш учун мамлакатни тарк этишини сўрашни топширди. Орадан кўп ўтмай, элчи Киевни тарк этди.
Кейинроқ Польша бош вазири Матеуш Моравецкий полшалик шифокорлар Тбилисида ҳибсда сақланаётган Саакашвили билан учрашгани, уни текширувдан ўтказаётгани ҳақида маълум қилди.
“Замин” янгиликларини “Telegram”да кузатиб боринг
