Тожикистон президенти Эмомали Раҳмон Саудия Арабистонига ташрифи давомида Каъбани зиёрат қилди. Бу ҳақда Президент матбуот хизмати хабар берди.
Эмомали Раҳмон “Марказий Осиё—Кўрфаз араб давлатлари ҳамкорлик кенгаши” форматидаги давлат раҳбарлари йиғилиши олдидан Маккага ташриф буюрди. У ҳаж зиёратига мўлжалланган махсус кийим (эҳром) кийиб, ўзига ҳамроҳ бўлган делегация аъзолари билан Каъбани етти марта тавоф қилиб, намоз ўқиди.
Шундан сўнг Тожикистон президенти Сафо ва Марва тепаликларига чиқиб, Замзам қудуғидан сув ичди. Раҳмон тожик халқининг фаровонлиги учун дуо қилди. Айтиш жоизки, у Саудия Арабистонига расмий ва амалий ташрифлар чоғида бешинчи марта Маккага ҳаж зиёратини амалга оширмоқда.
Эслатиб ўтамиз, бу йил ҳаж зиёрати 26 июнь куни бошланган. Пандемиядан кейин биринчи марта диний маросим санитария чекловларисиз ўтказилмоқда.
