20:41 / 20.07.2023

Россиялик эркак дрел ёрдамида ўзининг бошига чип ўрнатди

Россиялик Михаил Радуга дрел ёрдамида “аниқ тушлар” кўриши учун ўзининг миясига имплант ўрнатди. Бу ҳақда “Газета.ру” хабар берди.

40 ёшли эркак яқинда Россиядан Олмаотага кўчиб ўтган. Қозоғистонда у узоқ вақтдан бери режалаштирилган операцияни ўтказишга қарор қилган. У буни уйда, оддий дрел ва бошқа мавжуд воситалар ёрдамида ўтказган.

Манбага кўра, эркак тушини бошқариш илинжида имплант-электрод ўрнатишга қарор қилган. У яқин келажакда одамлар ўз тушини назорат қилиши мумкинлигига ишонади.

“Уйқудаги мияни кучайтириш бўйича бир ярим йил тайёргарлик кўрганман ва бу асосий мақсадим эди. Жиноий хавф-хатарлар ва бошқа маълум воқеалар туфайли ушбу даражадаги тадқиқотлар учун сезиларли истиқболларни йўқотдим. Кейин ўзим учун ягона вариантни танладим”, — дейди Радуга.

У одамларни бундай нарсаларни такрорламасликка чақиради.

“Бу сиз тасаввур қилганингиздан ҳам қийинроқ ва хавфлироқ. Операциянинг тўрт соатлик видеоси буни яққол кўрсатиб турибди. Мен жарроҳлик амалиётида етарлича ҳақиқий тажрибага эга эмасдим, бу эса кўп қон йўқотишга ва бошқа қийинчиликларга олиб келди”, — дейди у.

Эркак бир неча бор мия операцияси бўйича қўйларда тажрибалар ўтказган. Ўзида олиб борган операциядан беш ҳафта ўтиб шифокорлар унинг бош суягидан чипни олиб ташлаган. Оксфорд университети нейрохирурги тажрибани “ўта хавфли” деб атаган ва инфекция хавфи юқори бўлишидан огоҳлантирган.