Путинни аёвсиз танқидчиси Игор Стрелков Москвада қўлга олинди

Россия нашрлари ФХХнинг истеъфодаги офицери, «ДХР» собиқ мудофаа вазири Игор Стрелков қўлга олинганини ёзмоқда. Бу маълумот Стрелковнинг Telegram-каналида ҳам тасдиқланди.

Аввалига РБК нашри ҳуқуқни муҳофаза қилувчи органлардаги икки манбаси ва унинг адвокатига таяниб, Игор Стрелков (Гиркин) қўлга олинганини хабар қилди. Унда ёзилишича, 21 июл куни туш вақтида ФХХнинг истеъфодаги офицери ва ўзини мустақил деб эълон қилган «ДХР»нинг собиқ мудофаа вазирини уйидан олиб кетишган. Унинг квартирасида тинтув ишлари олиб борилмоқда.

Стрелковнинг қўлга олинганини унинг рафиқаси Мирослава Регинская ҳам тасдиқлаган. Унинг баёноти Стрелковнинг каналида эълон қилинди.

«Бугун соат 11:30 лар атрофида Тергов қўмитаси вакиллари уйимизга келишган, мен бу вақтда уйда эмасдим. Қоровулнинг айтишича, эримни номаълум томонга олиб кетишган. Дўстларим орқали эримга жиноят кодексининг 282-моддаси (экстремизм) бўйича айб қўйилаётганини аниқладим. Унинг қаерда эканини билмайман, ҳалигача алоқага чиққани йўқ», деган аёл Стрелковнинг каналида эълон қилинган баёнотда.

РБК манбасига кўра, Стрелковни «Вагнер» хусусий ҳарбий компанияси собиқ ходимининг аризасига кўра қўлга олишган.

Путинни кўп танқид қилаётганди

Игор Стрелков «Новороссия» ҳаракатининг энг фаол вакилларидан ҳисобланади ва Россиянинг Украинага босқинини фаол қўллайди. У уруш бошланганидан буён Россия раҳбариятини етарлича кескин ҳаракат қилмасликда айблаб келади. Охирги вақтларда Стрелков тўғридан тўғри Россия президенти Путинни танқид қилаётган, оммавий учрашувларида ҳам президент истеъфога чиқиши кераклигини айтаётганди.

Шунингдек, Стрелков «Вагнер» ХҲК раҳбари Евгений Пригожин билан ҳам даҳанаки жангга киришганди. Айниқса Пригожиннинг амалга ошмаган исёнидан кейин Стрелков фавқулодда фаоллик билан «Вагнер»ни танқид қилишга тушди.

2022 йил ноябр ойида Ҳаагадаги Халқаро жиноят суди Стрелковни 2014 йил Донбассда уриб туширилган Малайзиянинг «Боинг» самолёти бўйича ишда айбдор деб топганди. Ҳаага суди Стрелковни сиртдан умрбод қамоқ жазосига ҳукм қилган.

Квачковдан кейин

Стрелков қўлга олингани ҳақида хабар чиққанидан бир неча кун аввал Россияда мамлакат бош разведка ташкилоти бўлмиш Бош разведка бошқармаси (ГРУ) истеъфодаги полковниги Владимир Квачков ҳам қўлга олинганди. Улар иккиси Стрелков билан бирга «Ғазабдаги ватанпарварлар клуби»ни тузиб, уруш бошидан буён Россиянинг фронтдаги ҳаракатларини танқид қилиб келаётганди.

«Энди урушни қўллаётганларга етиб келишди»

BBC махсус мухбири Иля Барабанов Стрелковнинг қўлга олинишини изоҳлади.

«Стрелков 2014 йил Украина шарқида қилган ишлари учун тегиниб бўлмас одамдек қараларди. Афтидан, ФСБ офицерига тегинмаслик буйруғи жуда юқоридан келган. Ахир у шахсан Путинни ҳам танқид қилиб келаётган, 8,5 йилга қамалган Иля Яшин ёки 7 йилга қамалган депутат Алексей Гориновдан кескинроқ танқидлар билдираётганди.

Аввалига Россия ҳукумати урушга қаршиларни ушлаб қамаётганди, энди эса навбат урушни қўллайдиганларга ҳам етиб келган кўринади. «Вагнер» исёнидан кейин Россия ҳукумати аввалги тизим яхши ишламаётганини тушуниб етди ва энди бошқача ҳаракат қилишга ўтган кўринади», дейди Барабанов.

«Пригожин исёнининг оқибатларидан бири»

Сиёсатчи Татяна Становая ўз тelegram-каналида Стрелковнинг қўлга олиниши ҳақида пост қолдирди.

«Россия Мудофаа вазирлиги, Шойгу ва Путиннинг энг ашаддий танқидчиларидан бири бўлмиш Стрелковни қўлга олишди. Улар буни жуда узоқ кутишди. Стрелков мавжуд қизил чизиқларнинг барчасини кесиб ўтиб бўлган, махсус хизматларнинг уни қўлга олишга сабри чидамаётганди.

Унга қарши собиқ «Вагнер» командири ариза ёзгани эса ҳозир қандайдир аҳамият касб этмайди.
Унинг қўлга олиниши мудофаа вазирлиги фойдасига хизмат қилади. Ва бу Пригожин исёнининг оқибатларидан бири бўлди. Яъни армия ўз танқидчиларига босим қилишга қўшимча ваколат олганини очиқчасига кўрсатди. Оммавий қўлга олишлар бошланиб кетишига ишонмайман, аммо қолганлар ўзини тийиб олиши учун энг радикалларни қўлга олиш ҳам кифоя қилади», деб ёзди у.

Донбассдаги уруш ва Пригожин билан зиддият

2014 йил ФСБ истеъфодаги полковники Игор Стрелков Украина шарқидаги ҳарбий ҳаракатларда фаол қатнашганди. Ўзининг айтишича, 2022 йил февралда Россия Украинага бостириб кирганидан кейин бир неча марта фронтга боришга ҳаракат қилган, аммо барча ҳаракатлари бесамар кетган.

«Вагнер» раҳбари Евгений Пригожин билан ҳам даҳанаки жангга борган Стрелков уни кўп марта ҳақорат ҳам қилган. Пригожиннинг исёнидан кейин Стрелков уни ватан хоини деб атай бошлади. У исёндан кейин ҳам Пригожин билан ишлашда давом этган «Вагнер» командирларини ҳам хиёнатда айблади.

Стрелков 9 июл куни Петербургда вагнерчилар исёни бўйича маъруза қилишга чоғланганди. Лекция жойи сифатида ултраўнгчилар орасида машҳур «Листва» китоб дўкони танланди. Аммо полиция бу тадбирни бекор қилди.