Украина мудофаа вазири Алексий Резников CNN телеканалига берган интервьюсида Украинанинг қарши ҳужуми графикдан ортда қолаётганини, аммо бу уни безовта қилмаслиги, чунки ҳаммаси режа бўйича кетаётганини айтди.
Вазир қарши ҳужумларнинг барчаси “тезкор бўлиши керак” деган янглиш фикр борлигини таъкидлади. Унинг сўзларига кўра, ҳужум секин бормоқда, чунки “ҳаво ҳужумидан мудофаа муаммоси” бор, фронт олди чизиғи эса юзлаб километрга чўзилган.
“Рақибларимиз сони кўп. Шундай экан бу компьютер ўйини эмас, уруш”, — деди вазир интервьюда.
Резниковнинг сўзларига кўра, Украина жанубидаги вазият, асосан, Россия миналаган майдонлар туфайли секинлашган, уларни бузиб ўтиш қийин. Украина ҳарбийлари миналанган майдонлар бўйлаб хавфсиз йўллар қуриши керак, деди вазир.
Резников аннексия қилинган Қримга ва Қрим кўпригига уюштирилган дронлар ҳужумига ҳам изоҳ берди. Унинг билдиришича, Киев бундай ҳужумларни давом эттиради.
“Бу нишонларнинг барчаси расмий, чунки уларга зарба бериш русларнинг бизга қарши кураш қобилиятини пасайтиради ва украиналикларнинг ҳаётини сақлаб қолишга ёрдам беради”, — деди Резников Қримга сўнгги дрон ҳужумларига ишора қилиб.
Журналистнинг Украина Қрим кўпригини бутунлай ишдан чиқаришни мақсад қилганми, деган саволига Резников шундай жавоб берди:
“Душманнинг ўқ-дорилар, ёнилғи, озиқ-овқат оладиган логистика йўлларини бузиш — одатий тактика. Шунинг учун уларга қарши ушбу тактикани ишлатамиз”.
Резников ўша интервьюсида НАТОнинг навбатдаги саммитига қадар: 2024 йил июлгача Россия—Украина уруши Киевнинг ғалабаси билан якунланишини, шундан сўнг мамлакат альянсга таклиф олишини прогноз қилган.
“Замин” янгиликларини “Telegram”да кузатиб боринг
