Медведев: “Россия 2008 йилда бўлгани каби ўз шартлари асосида тинчликка эришади”

Россия Хавфсизлик кенгаши раҳбари ўринбосари Дмитрий Медведев Telegram каналида Россиянинг Грузия—Жанубий Осетия можаросидаги иштирокини Украинада олиб борилаётган “ҳарбий ҳаракатлар”га қиёслади.

Айнан Дмитрий Медведев 2008 йил 8 август куни Россия президенти сифатида Жанубий Осетия ҳудудида тинчлик ўрнатиш бўйича операция бошланганини эълон қилганди.

“Аҳмоқ Саакашвилининг ортида Россия чегаралари яқинидаги вазиятни ‘лойқалатишга’ уринган Ғарб жамоаси турарди. Ўшанда қуролли кучларимиз Абхазия ва Жанубий Осетияда яшаган одамларимизни душмандан ҳимоя қилди”, — деб ёзади у.

Дмитрий Медведевнинг сўзларига кўра, 2008 йилда “АҚШ ва унинг вассалларида тажриба етишмагани аниқ”. Бироқ, энди, Россия Федерацияси Хавфсизлик Кенгаши раҳбари ўринбосарининг фикрича, “улар яна ‘бировнинг қўли билан’ уруш олиб боришмоқда, Россияни ер юзидан йўқ қилишга уринмоқдалар”.

“Бутун НАТО тизими бизга қарши амалда очиқ курашмоқда. Махсус ҳарбий операциянинг барча вазифаларини ҳал қилиш учун кучларимиз етарли. 2008 йилнинг августида бўлганидек, бизнинг душманларимиз тор-мор қилинади ва Россия ўз шартлари билан тинчликка эришади”, — дея қўшимча қилди Медведев.

Михаил Саакашвили 2004—2013 йилларда кетма-кет икки муддат Грузия президенти бўлган. 2008 йил 8 августда у ажралиб чиқишга қарор қилган Жанубий Осетия ҳудудига қўшин киритиш тўғрисида буйруқ берди. Бунга жавобан Россия Грузияга қарши беш кун давом этган урушни бошлаганди.

Янгиликлар