Путиннинг жияни ҳарбий банкнинг топ-менежери экани аниқланди

Россия президенти Владимир Путиннинг қариндошлари банклар ва давлат корпорацияларида ишлашни афзал кўради. Жумладан, Путиннинг жияни Вера Подгузова 2020 йилда “Промсвязбанк” катта вице-президенти бўлган, ўша пайтда у 36 ёшда эди. Бу ҳақда Тhе Moscow Times хабар берди.

“Промсвязбанк” давлат мудофаа буюртмасига хизмат қилгани учун Ғарб санкциялари остида. Путин жиянининг ойлик маоши деярли 2 миллион рублни (тахминан 20 715 доллар) ташкил қилади. Унинг турмуш ўртоғи Дмитрий Подгузов Россия темирйўллари касалхонасида маъмурий ва иқтисодий масалалар бўйича директор ўринбосари лавозимида ишлайди.

Вера Подгузова 23 ёшига қадар отаси, ҳарбий жарроҳ Александр Соколовнинг фамилиясида бўлган. Бироқ у 2007 йилда Вера Путина бўлишга қарор қилган. Айнан ўша пайтда унинг сиёсий карьераси бошланган.

“Россия Единая” партия журнали бош муҳаррири сифатида 2 йиллик фаолиятидан сўнг у партиянинг кадрлар захирасига киритилган. У дарҳол Санкт-Петербург марказий округи муниципиал депутати этиб сайланган. 2010 йил сентябрда “Ганзaкомбанк” директорлар кенгаши аъзоси бўлган.

Вера “Промсвязбанк”ка ўтгунга қадар Россия экспорт марказида ташқи алоқалар ва коммуникациялар бўйича бошқарувчи директор бўлиб ишлаган.

Подгузова онаси томонидан Путиннинг жияни ҳисобланади. Интервьюда у “ота-онаси” томонидан унга омад кулиб боққани ҳақида айтган.

“Улар менга кўп нарсани ўргатди — ҳар бири ўз йўлида ва мен йиллар давомида кўп нарсаларни тушундим. Оила аъзоларимнинг баъзи хусусиятлари менда табиий равишда уйғонади, бунинг учун жуда миннатдорман”, — деган у.

Путиннинг яна бир жияни Елена Жидкова Россиянинг 75 та субъектидаги 360 та шифохона ва поликлиникани ўз ичига олган “РЖД-Медицина” раҳбари. Унинг йиллик даромади 20 миллион рублни (тахминан 206 675 доллар) ташкил қилади. Унинг онаси президент маъмуриятининг амалдорлар даволанадиган поликлиникасида бош шифокор ўринбосари ҳисобланади.

Янгиликлар