АҚШ Эрондаги америкалик маҳбусларни 6 млрд доллар эвазига алмаштиряпти

Эрон ва АҚШ ҳар икки томонда беш нафардан маҳбусни озод қилиш бўйича келишувга эришди, биринчи қадам уларни уй қамоғига ўтказиш бўлди, деб маълум қилди Теҳроннинг Бирлашган Миллатлар Ташкилотидаги миссияси.

“Учинчи томон воситачилигида тузилган гуманитар ҳамкорлик тўғрисидаги битим доирасида Эрон ва Қўшма Штатлар беш маҳбусни ўзаро озод қилишга ва афв этишга келишиб олди. Бу маҳбусларнинг қамоқхонадан ташқарига кўчирилиши ушбу келишувни амалга оширишдаги муҳим дастлабки қадамдир”, — дея эронлик дипломатларнинг сўзларидан иқтибос келтирган Reuters.

АҚШ Давлат котиби Энтони Блинкеннинг айтишича, Давлат департаменти Эронда ҳибсда сақланган америкаликлар билан алоқага чиққан.

“Улар қамоқдан чиққанидан жуда хурсанд. Ишончим комилки, бу маҳбуслар қора тушининг якуни. Уларни уйга олиб келиш учун ҳали кўп иш қилиш керак”, — деди Блинкен.

Эрон ташқи ишлар вазири ўринбосари Али Багери Канининг айтишича, келишув доирасида АҚШга қўйилган талаблар орасида эронликларни АҚШ қамоқхоналаридан озод қилишдан ташқари, Эроннинг “миллиардлаб долларлик” активларини блокдан чиқариш ҳам бор. Унинг сўзларига кўра, Вашингтон келишув шартларини бажариш бўйича “зарурий мажбуриятни” олган.

Reuters ва The New York Times газеталарининг масаладан хабардор манбаларига таяниб ёзишича, Эрон Жанубий Кореядаги 6 миллиард доллар маблағи блокдан чиқарилганидан кейин, америкаликларни озод қилади. Reuters манбаларидан бири АҚШ фуқароларининг Эрондан чиқиб кетишига бир неча ҳафта керак бўлиши мумкинлигини айтди.

Манбанинг қайд этишича, блокдан чиқарилгач, маблағлар Жанубий Корея банкларидан бошқа молия муассасасига ўтказилади. Улардан чекланган ҳисоб рақамларига ўтказмаларда ва фақат озиқ-овқат ёки дори-дармон сотиб олиш каби инсонпарварлик мақсадларида фойдаланиш мумкин.

Эроннинг Tasnim ахборот агентлиги маълум қилишича, маблағлар аввал Жанубий Корея валютасидан еврога конвертация қилинади, сўнгра Эрон фойдалана оладиган Қатардаги ҳисоб рақамига юборилади.

Блинкен, келишув Эронга қўйилган санкцияларни енгиллаштиришини англатмаслигини таъкидлади:

“Биз барча санкцияларимизни қўллашда давом этамиз. Эроннинг минтақада ва ундан ташқарида беқарорлаштирувчи фаолиятига қатъий қаршилик кўрсатишда давом этамиз. Бу саъй-ҳаракатларнинг ҳеч бири ўзгармайди”.

Янгиликлар