Россия Қуролли кучлари лейтенанти Иван Королев Литва чегарасини ноқонуний кесиб ўтиб, сиёсий бошпана сўради. Бу ҳақда Королевга таяниб, BBC рус хизмати хабар берди.
Ҳарбий хизматчи 59313-39-сонли (“Шарқий ҳарбий округнинг бирлашган стратегик қўмондонлиги”) ҳарбий қисмда хизмат қилган. Бу қисм Хабаровск ўлкасининг Тейсин қишлоғига жойлаштирилган.
Королев Вильнюсга етиб олишга муваффақ бўлган ва у ерда 10 август куни Литва чегара хизмати тезкор ходимлари томонидан автовокзалда қўлга олинган. Шундан сўнг у чегара постига қайтарилиб, у ерда яна бир кун қолган.
Королевнинг сўзларига кўра, 3 август куни у “қонли урушда” қатнашишни истамагани сабабли Россияни тарк этишга қарор қилган.
“Мен ъмахсус ҳарбий операцияъда қатнашдим, лекин шу вақтгача Россия ҳудудида эдим. Украинада бўлмаганман, биз рус қўшинларини ўқ-дорилар билан таъминлаш бўйича шуғулланардик. Россиядаги барча бўлинмалардан ўқ-дориларни олиб, уларни тўғридан-тўғри Украинадаги бригадаларга, бўлинмаларга тарқатдик”, — дейди лейтенант.
У артиллерия омборининг ҳисоб ва эксплуатация бўлими бошлиғининг ўринбосари эканини айтди. Королевнинг бошпана ҳақидаги аризаси кўриб чиқиш учун қабул қилинган. Шундан сўнг у Пабрадедаги миграция марказига юборилган.
“Zamin”ни Telegram'да ўқинг!
